Barzanî bi Generalê Brîtanî re civiya: Heta serkeftina yekcarî…

PeyamaKurd - Şêwirmendê Encûmena Asayişa Herêma Kurdistanê Mesrûr Barzanî îro 4ê Nîsanê bi Şêwirmendê Wezareta Bergîriyê ya Brîtanyaya Mezin yê Rojhilata Navîn General John Lorimer û şanda pê re hevdîtinek pêkanî.

Balyozê Brîtanyayê li Iraqê John Wilkes jî di civînê de amade bû û pêşhatên dawî yên navçê û piştevaniya Brîtanya ji bo hêza Pêşmerge hatin guftûgokirin.

Mesrûr Barzanî rola hikûmet û şêwirmendên leşkerî yên Brîtanya di rahênankirin û yekxistina hêzên Pêşmerge de bilind nirxand û pêwîstiya karên cidî bo çareserkirina sedemên serîhildana teror û tudûtûjiyê anî ziman.

Şêwirmendê Wezareta Berîgiriyê yê Brîtanya bo Rojhilata Navîn John Lorimer jî destnîşan kir, welatê wî di çarçoveya hevpeymaniya cîhanî de bi rahênankirin û piştevanîkirina hêzên Pêşmege û Iraqê berdewam dibe ta serkeftina yekcarî bi ser terorê de pêk were.

Lorimer herwiha ji bo navçeyên ku tevegera DAIŞê lê heye girîngiya hevahengiya di navbera hêzên Pêşmerge û hêzên Iraqî de bibîr xist.

Di hevdîtinê de, pêşhatên rewşa Sûriyê jî hatin guftûgo kirin û girêdayî wê babetê jî Şêwirmendê Encûmena Asayişa Herêma Kurdistanê tekezî li ser diyalog, çareseriya siyasî û garantiya maf û ewlehiyê ji bo hemû pêkhateyên Sûriyê û bi taybetî gelê Kurd li wî welatî kir.