Daxuyanî: Hemû sazî û dezgehên Rojava weke xwe bimînin

PeyamaKurd - Rêveberiya Xweser a Rojavayê Kurdistanê ragihand, tevî ku rêkeftin bi hikûmeta Sûriyê re hatiye kirin jî saziyên rêveberiyê weke berê kar dikin û ti guhertin di wan de çênebûye.

Rêveberiya Xweser li ser rêkeftina Hêzên Sûriyeya Demokratîk û hikûmeta Sûriyê daxuyaniyek belav kir û di 3 bendan de hin zelalkirin li ser naverok û encamên vê rêkeftinê dan.

Di daxuyaniya  ku îmzeya herdu hevserokên rêveberiyê, Bêrîvan Xalid û Ebid Elmehbaş heye de, Rêveberiya Xweser ragihand, “Rêkeftina Hêzên Sûriyeya Demorkatîk bi hikûmeta Sûriyê re, rêkeftineke serbazî ye û ji bo parastina Sûriyê ji êrîşa Tirkiyê ye.”

Hat destnîşan kirin ku hemû dezgeh û saziyên Rêveberiya Xweser weke berê kar dikin û ti guhertin di wan de çênebûye.

Di daxuyaniyê de hat gotin: “Em rêkeftinê ji bo tevahiya karmendan zelal dikin û wan ji bo xizmeta xelkê han didin.”

Di roja 5an a êrîşên leşkerî yên Tirkiyê de doh 13ê Cotmehê rêkeftin hatibû ragihandin û artêşa Sûriyê dest bi kontrolkirina herêmên bin desthilata HSDê kiribû.