Dadweriya Bilind a Iraqê hisyarî da namzedên hilbijartinê

PeyamaKurd - Encûmana Bilind a Dadweriya Iraqê hişyarî da namzedên hilbijartina pêşwext a Parlamentoya Iraqê ku wê roja 10ê Cotmehê were lidarxistin.

Navenda ragihandina encûmena bilind a dadweriya Iraqê bi daxuyaniyekê ragihand: “Nabe namzedên hilbijartinê girtiyan û dosyayên wan bikin mijareke bangeşeya hilbijartinê.”

Encûmena bilind a dadweriya Iraqê ragihand: “Nabe sûd ji rewşa girtiyan û merivên wan bê girtin û ji wan re ragihînin ku dikarin dosyayên wan dê zelal paqij bikin û li hember wê jî deng bixwazin.”

Herwiha hat diyarkirin ku dadgeh nakeve bin emrê ti telefon û pêwendiyeke namzedan.

Encûmena bilind a dadweriya Iraqê got, heger kesekî girtî biryara azadkirina wî derkeve jî tenê dadgeh û yasa dikare wê biryarê bidin û bi dehan namzed nikarin bi guvaşa li ser dadgehê ti girtiyekî azad bikin.

Encûmena bilind a dadweriyê hişyarî da namzedan û da xuyakirin, heger bangeşeyên wisa berdewam bikin, wê demê ji bo parastina serxwebûna dadgehê dê tedbîran li dijî wan bistînin.