Li ser sînorê Belarûsê ciwanekî Kurd ji ber sermayê can da

PeyamaKurd - Hat ragihandin ku îro Înê li ser sînorê Belarûs û Polandê ciwanekî Kurd jiyana xwe ji dest daye.

Li gorî zanyariyên hatine, li ser sînorê Belarûs û Polandê xortekî Kurd ê 14 salî ji ber sermayê jiyana xwe ji dest daye. Hîn agahiyên berfireh li ser mirina wî ciwanî belav nebûne.

Hêjayî gotinê ye, krîza koçberên li ser sînorên Belarûs, Lîtvanya û Polandê asê mane ev demek e di rojeva cîhanê de ye. Tevî bang û hişyariyên rûdana karesateke mirovî jî hîn çareseriyek nehatiye dîtin û destûra derbasbûna wan a bo Ewropayê jî nayê dayîn.

Di nav çend rojên borî de hejmarek koçberên din ên asêmayî li ser sînorên wan welatan can dabûn ku du kes ji wan Kurd bûn.