Îran ji rêkeftina atomî vekisiya

PeyamaKurd - Hikûmeta Îranê bi fermî bidawîhatina rêkeftina atomî ragihand û diyar kir, ji niha pê ve hemû astengên li ber bernameya atomî ya wî welatî têne rakirin û êdî ti sînorek ji bo bernameya atomî  ya wî welatî nîne.

Hikûmeta Îranê di daxuyaniyeke fermî de ragihand, ev biryar pêngava pêncem û dawî ya kêmkirina pabendiyên wî welatî di çarçoveya rêkeftina atomî  de ye.

Hikûemta Îranê dibêje, ji niha pê ve bernameya atomî  ya wî welatî dê li gor pêwîstiyên teknîkî yên bernameyê berdewam be, û Saziya Enerjiya Atomî  ya welat erkdar kiriye bi hevahengî li gel serokomar, pêngavan bavêje û rêkarên pêwîst bicih bîne

Di daxuyaniya hikûmeta Îranê de herwiha hatiye gotin: “Alîkariya Îranê li gel Ajansa Nadewletî ya Enerjiya Atomî  dê wek berê berdewam be. Di egera rabûna ceza û dorpêçan û sûdmendbûna Îranê ji qazancên rêkeftina atomî , Komara Îslamiya Îranê amade ye vegere ser pabendiyên xwe yên di rêkeftina atomî  de.”

Hikûmeta Îranê Rêxistina Enerjiya Atomî  ya wî welatî erkdar kir ku wan rasparedeyên hikûmetê bi hevahengî li gel Serokomar cîbicî bike.

Pêştir Amerîka ji rêkevtina atomî  ya ligel Îranê vekişiyabû û dorpêçên giran li ser Îranê sepandibûn.

Ev yek di demekê de ye ku piştî kuştina Fermandarê Supaya Quds a Pasdarên Îranê Qasim Sulêymanî ji aliyê Amerîkayê ve, alozî di navbera herdu welatan de zêde bûne û herwiha herdu alî gefan li hev dixwin. Berpirs û rayêdarên Îranê dibêjin  ew dê  tola Qasim Sulêymanî ji Amerîkayê hildin.