Qamislo | Pistî 54 salan du malbatên xwîn di navbera wan de hebû li hev hatin

PeyamaKurd – Bi navbeynkariya Encûmena Rûspiyên Rêveberiya Bakur û Rojhilatê Sûriyê û Partiya Demokrat a Pêşverûya Kurd a Sûriyê û bi beşdariya hemû aliyên siyasî û kesayetên serbixwe û rûspiyên deverê, li bajarê Qamişlo yê Rojavayê Kurdistanê, piştî 54 salan, du malbatên xwîn di navbera wan de hebû, li hev hatin.

Her du malbatên Hecî Reşîd û Hecî Elî, piştî 54 salan, aloziya di navbera de jibîr kirin û dîsa li hev hatin.

Malbata Hecî Reşîd diyar kir, wan ev lihevhatin, bê şert û merc qebûl kirin û berî her kesî xwîn jibîr kirin û qerebû jî nexwestin.

Mijara heyf û tolhildanê li deverê, çandeke kevn û dîrokî ye û bûye sedema koçberiya gelek malbatên ku xwîn di navbera wan de çêbûye, ji ber vê yekê kesên navbeynkar dibêjin; ev lihevhatin gaveke ber bi parastina jiyana aştiyane û rakirina van adetên kevn e, ku bandora wan a neyênî li ser civakê heye.

Hemû pêkhateyên beşdar, tekezî li berdewamiya gavên bi vî rengî kirin û destnîşan kirin, pêwîstî bi destpêşxeriyên wiha heye, nemaze di rewşa niha ya Sûriyê de ku bi deh hezaran kesan canê xwe ji dest dane.