Bi qasî 50 parlamentarên AKPê bi partiya Davutoglu re danûstandinê dikin

PeyamaKurd - Alîkarê Serokê Giştî yê Partiya Pêşerojê ya Ahmet Davutoglu seroktiya wê dike, Selçuk Ozdag got ku bi nêrîna wan wê di nav AK Partiyê de perçebûn û veqetîn çêbibe û diyar kir, ew bi nêzîkî 50 parlamenterên AKPê re gotûbêj û danûstandinê dikin.

Selçuk Ozdag di bernameya Halk TV de îdia kir ku ji ber zêdebûna pirsgirêkên aborî û îdiayên Sedat Peker, di nav AKPê de nerazîbûn hene û bersiva pirsa ‘gelo di nav AKPê de çend parlamenterên hevalên te hene’ wiha da:

“Gelek parlamenter û burokrat hene ku di şeş mehên dawî de bi me re axivîne. Ew bi giranî bêhêvî dibin. Ev kes bi me re hevdîtinê dikin ji ber ku ew her roja ku diçe bingeha xwe ya civakî winda dikin, ji ber ew dizanin ku ew piştgiriya gel winda dikin û tenê bi piştgiriya dewletê radiwestin. Di van demên dawî de zêde bûye. Di hawirdorek wisa de, çareseriyên veşartî hene. AKP wê di pêşerojek nêzîk de windahiyên cidî bide û hûn ê beşdarbûnê bibînin. Dê ji MHPê jî tevlîbûn hebe. Em bi nêzîkî 50 parlamenteran re hevdîtinê dikin. şêwira me bi van hevalan re zêde bûye.”

Selçuk Ozdag herwiha got, îhtimala ku di meha Mijdara 2021ê de hilbijartinên pêşwext bên lidarxistin zêde ye.