سەردانەکەی نێچیرڤان بارزانی دانووستانەکانی کورد و بەغدا بەهێز و پێشکەوتووتر دەکات
پەیامی کورد ... سوپاسالاری پێشووی عێراق دەڵێ، دوای چوونی سەرۆکی ھەرێمی کوردستان بۆ بەغدا، دانووستانی چڕ لە نێوان ھەرێم و بەغدا لە بارەی وەرگرتنەوەی پشکی کورد لە پۆستە ئەمنییەکان دەستی پێکردووە، لەماوەیەکی نزیکدا رەنگە ئەو پرسە یەکلایی بکرێتەوە، چونکە کورد کۆمەڵێ پۆستی گرینگی ئەمنی بەردەکەوێت.
بابەکر زێباری رایگەیاند: "زۆر زەروورە سیستمی پێشوو پەیڕەو بکرێت لە دابەشکردنی پۆستە ئەمنییەکانی عێراق، ئەویش ٤٥ % بۆ شیعە و ٢٥% بۆ سوننە و ٢٠% بۆ کورد، ئەوەی دیکەش بۆ پێکھاتەکان داندرابوو، بۆیە ماوەی ھەفتەیەکە دانووستان لە نێوان ھەرێم و بەغدا لەسەر وەرگرتنەوەی پۆستەکان دەستی پێکردۆتەوە و، شاندێکی باڵای ھەرێمی کوردستانیش لە چەند رۆژی ڕابردوو سەردانی بەغدای کردووە و دانووستانیان لەسەر ئەو پرسە کردووە".
سوپاسالاری پێشووی عێراق گوتیشی: "گرینگە کورد سەرجەم پۆستەکانی وەربگرێتەوە، وەکو سوپاسالار و ئەمینداری گشتی و چوار جێگریشی لە وەزارەتی بەرگری ھەیە، پشکێنەری گشتییە و چەندین بەڕێوبەریش، بۆیە ئەگەر کورد ئەو پۆستانە وەرگرنەوە، ئەوا رۆڵی کورد لەناو سوپای عێراق زۆر باش دەبێت و دەتوانێ بەرگری باش لە ھەرێمی کوردستان بکات، چونکە تەنھا وەزارەتی بەرگری نییە وەزارەتی ناوخۆش کورد پشکی ھەیە".
بابەکر زێباری باسی لەوەشکرد، کە چەندین لیژنەی ھاوبەشیش پێکھاتووە و گفتووگۆ لەسەر سەرجەم کێشەکان دەکرێت، لەوانە ناوچە کوردستانییەکان، کە تاوەکو ئێستا دانووستانەکان خاو بوون، بەڵام دوای چوونی سەرۆکی ھەرێم بۆ بەغدا ھێزێکی داوەتە ئەو پرۆسەیە و لە ماوەیەکی نزیکدا ئەو پرسەش یەکلایی دەکرێتەوە، چونکە سەردانەکە دەبێتە ھاوکارێکی باش.
زێباری گوتیشی: "ئەگەر سوپاسالار بدرێتەوە کورد، دەستەڵاتێکی یەکجار زۆری ھەیە، ھەموو ھێزی عێراق لە دەست ئەو دەبێت و بەھیچ شێوەیەک ناتوانن غەدر لەکورد بکەن، بۆیە پێویستە کورد ئەو پۆستانە وەربگرێتەوە".