داهاتی نۆ مانگی فرۆشتنی نەوتی عێراق زیاتر لە 90 ملیار دۆلار بووە

پەیامی کورد... داهاتی نۆ مانگی فرۆشتنی نەوتی عێراق زیاتر لە 90 ملیار دۆلار بووە


بڕی داهاتی فرۆشتنی نەوتی عێراق کە لە نۆ مانگی ساڵی 2022دا فرۆشراوە، زیاترە لە 90 ملیار دۆلار.

کۆمپانیای سۆمۆی عێراقی له‌ ئامارێكدا ئاشكرایده‌كات، بڕی داهاتی نەوتی عێراق کە لە ماوەی نۆ مانگی ساڵی 2022دا فرۆشراوە، 90 ملیار و 388 ملیۆن و 786 هەزار و 336 دۆلار بووە، بە تێکڕای مانگانەی 10 ملیار و 43 ملیۆن و 198 هەزار و 481 دۆلار.

باس له‌وه‌ش كراوه‌، داهاتی فرۆشتنی نەوت لەمساڵدا بەراورد بە ساڵی 2021 بەڕێژەی %70.6 زیادیکردووە، بەوپێیەی لە ساڵی ڕابردوودا داهات 52 ملیار و 981 ملیۆن و 515 هەزار و 830 دۆلار بووە، بە تێکڕای مانگانەی 5 ملیار و 886 ملیۆن و 515 هەزار و 830 دۆلار.

سۆمۆ ئه‌وه‌شی خستۆته‌ڕوو، مانگی ئایاری ئەمساڵ زۆرترین داهاتی فرۆشتنی نەوتی تێدا تۆمارکراوە، کە گەیشتە 11 ملیار و 477 ملیۆن و 514 هەزار و چوار دۆلار، لەکاتێکدا مانگی کانونی دووەم کەمترین داهاتی تێدا تۆمارکراوە بە بڕی هەشت ملیار و 322 ملیۆن و 679 هەزار و 526 دۆلار