نرخی نەوت لە بازاڕەکانی جیهاندا

پەیامی کورد  ...  بە گوێرەی هەواڵی ئاژانسەكانی ئابووری لە جیهان بڵاویان كردەوە ئەمڕۆ 23ی 2ی 2019 نرخەكانی نەوت له‌ بازاڕه‌كانی جیهاندا بە هۆی لێکنزیکبونەوەی زیاتری ئەمریکا و چین و ئەگەری واژۆکردنی رێککەوتننامەیەکی بازرگانی، بەرزبونەوەیەکی بەرچاوی بەخۆوە بینی و گەیشتە بەرزترین ئاست لەمساڵدا.

بەپێی ڕاپۆرتی ئاژانسی هەواڵی ڕۆیتەرز ، نرخی یەک بەرمیل نەوتی برێنت گەیشتوەتە 67.73 دۆلار کە دەکاتە بەرزبونەوەی لەسەدا 1.2ی نرخی هەفتەی پێشو، بەرزترین ئاستی خۆی لەمساڵدا تۆمارکردوە.

هاوکات نرخی نەوتی تەکساسیش بڕی 30 سەنت زیادیکردوە و لە 57.26 دۆلاردا جێگیربوە، ئەوە لەکاتێکدا سەر لەبەیانی رۆژی هەینی نرخی نەوت تەکساس گەیشتە بەرزترین ئاستی خۆی کە 57.81 دۆلارە، بەوەش دەرکەوت هەفتانە نرخی نەوتی تەکساس سێ سەنت زیادیکردوە.

شاندی دانووستانکاری ئەمریکا و چین ڕۆژی هەینی کۆبونەوە بۆ بڕیاردان لەسەر درێژەدانی کۆبونەوەکان و هەردوولاش پەرۆشییان پێوەدیاربو کە دەیانەوێت تا رۆژی یەکی ئازاری داهاتوو بگەنە رێکەوتنێک.

لەوبارەیەوە ئاندی لیپۆ، سەرۆکی کۆمپانیای نەوتی لیپۆ ڕایگەیاند، ئەگەری زۆری گەیشتن بەرێکەوتنێکی بازرگانی لە نێوان چین و ئەمریکا گڕوتینێکی خستە ناو بازاڕەکانی جیهان بەگشتی و نرخی نەوتیشی بەرزکردەوە.

رێککەوتنی بازرگانی نێوان چین و ئەمریکا هاوکاتە لەگەڵ بڕیاری کەمکردنەوەی بڕی هەناردەکردنی نەوت لەلایەن ڕووسیا ووڵاتانی هەناردەکاری نەوت.

هاوکات پرسی سەپاندنی سزا بەسەر دوو ووڵاتی دیکەی هەناردەکاری نەوتدا کە ئێران و ڤەنزوێلایە وایکردوە بەردەوام نرخی نەوت لەبەرزبونەوەدا بێت و لە ئایندەشدا چاوەڕوانی بەرزبونەوەی دەکرێت.