لیرەی توركی دابەزینێكی دیكەی پێوانەیی تۆماركرد

پەیامی کورد... لیرەی توركی دابەزینێكی دیكەی پێوانەیی تۆماركرد


لیرەی توركی دابەزینێكی بێ پێشینەی تۆماركرد لە 26.10 بەرامبەر دۆلار لە بەیانی ئەمڕۆدا.

دابەزینەكە دوای ئەوە هات بەرپرسان و شارەزایانی بانك رایانگەیاند، بانكی ناوەندی بەكارهێنانی یەدەگی بۆ پاڵپشتی دراوی توركی راوەستاندووە، وەك ئەوەی رۆیتەرز ئاماژەی پێداوە.

دواتر لیرە بەرزبوونەوەیەكی كەمی تۆماركرد و گەیشتە 26.05 بەرامبەر دۆلار، بەبێ گۆڕانكارییەكی ئەوتۆ كە بیگەیەنێتە ئاستی داخستنی رۆژی پێشتر.

لە سەرەتای ئەمساڵەوە لیرەی توركی 28%ی بەهاكەی لەدەستداوە، بەپێی ئاژانسەكە.

سەرەڕای ئەو گۆڕانكارییە گەورەیەی بەسەر سیاسەتی بانكی ناوەندیی توركیادا هات لە رۆژی پێنجشەممەی رابردوو بە بەرزكردنەوەی نرخی سوود بۆ 15% بۆ یەكەمجار لە ئاڤاری 2021ەوە، بەڵام ئەو هەنگاوە كاریگەریی گەورەی لەسەر نرخی دراوە توركییەكە نەكرد.