دوو مێرمنداڵی کورد دوای ئەشکەنجەیەکی زۆر لەلایەن ئیتلاعاتی ئێرانەوە ئازاد کران
پەیامی کورد... دوو مێرمنداڵی کورد دوای ئەشکەنجەیەکی زۆر لەلایەن ئیتلاعاتی ئێرانەوە ئازاد کران
دوو کچی مێرمنداڵی خەڵکی مەهاباد کە حەفتەی ڕابردوو دەستبەسەر کرابوون دوای ئەشکەنجە و لێدانێکی زۆر ئازاد کراون.
بەگوێرەی ڕاپۆرتێکی ڕێکخراوی مافی مرۆڤی هەنگاو، لە ڕۆژانی ڕابردوودا دوو کچی مێرمنداڵی خەڵکی گوندی «کۆسە کەرێز» ی شاری مەهاباد بە ناوەکانی پەریسا سپاهی تەمەن ١٧ ساڵ و کەویار ئەلیاسی تەمەن ١٨ لە دەستبەسەرگەی ئیدارەی ئیتلاعات ئازاد کراون.
بە وتەی سەرچاوەیەکی ئاگادار، ئەم دوو کچە مێرمنداڵە لە کاتی دەستبەسەرکران لەلایەن هێزەکانی ئیدارەی ئیتلاعات بە سەختی ئەشکەنجە کراون و لەلایەن ناوەندە ئەمنییەکانەوە بە هاوکاری کردنی حیزبێکی کوردستانی تۆمەتبار کراون.
پەریسا سپاهی و کەویار ئەلیاسی دوای ئازاد کرانیش دووجار بانگ کراونەتە ئیدارەی ئیتلاعاتی مەهاباد و بۆ ماوەی چەند کاتژمێر لێپرسینەوەیان لەگەڵ کراوە.
ئەم دوو مێرمنداڵە ڕۆژی یەکشەممە ١٤ی خاکەلێوەی ٢٧٢٢ (٣ی ئەپریلی ٢٠٢٢) لەگەڵ سێ هاووڵاتیی دیکە بە ناوەکانی عیرفان زولفی نیا ١٨ ساڵە و خەڵکی سەقز، یووسف حەشرەتی ٢٢ ساڵە و مەنسوور کانی ڕەشی ٣٢ ساڵە خەڵکی پیرانشار لەلایەن ئیدارەی ئیتلاعاتی پیرانشارەوە دەستبەسەر کرابوون.