مامۆستایانی قوتابخانەکان لە زۆربەی شارەکانی کوردستان و ئێران ناڕەزایەتییان دەربڕی
پەیامی کورد... مامۆستایانی قوتابخانەکان لە زۆربەی شارەکانی کوردستان و ئێران ناڕەزایەتییان دەربڕی
ڕۆژی یەکشەممە ١ی ئایاری ٢٠٢٢، لە زۆربەی شارەکانی کوردستان و ئێران مامۆستایانی قوتابخانەکان بە نیشانەی ناڕەزایەتی و دۆخی بژێوی ژیانیان هاتنە سەر شەقامەکان.
مامۆستایانی قوتابخانەکان داوای مافەکانی خۆیان دەکەن کە لەلایەن ڕێژیمی ئێرانەوە لێیان زەوت کراوە.
مامۆستایانی قوتابخانەکان لەو ناڕەزایەتییەدا کۆمەڵێک دروشمیان وتووەتەوە کە بریتین لە: "مامۆستای زیندانی دەبێ ئازاد بکرێت"، "هاوار هاوار لەو هەموو زوڵم و زۆرییە"، "مامۆستا هاوار بکە و داوای مافی خۆت بە".
لە شاری "بووشهێر" هێزە سەرکوتکەرەکانی ڕێژیم هەڵیانکوتاوەتە سەر خۆپیشاندانی هێمنانەی مامۆستاکان و دوای لێدان و هێرش بۆ سەر ژمارەیەک لەو مامۆستایانە لەوانە "حەمید خوجەستە، ئەڕدەشیر سیادی، یووسف سەیادی، فەرەیدوون شەفیعی، مەحموود ملاکی و مۆحسین عومڕانیـ"ـیان، دەسبەسەر کردووە.
ماوەی دوو ساڵە مامۆستاکان داوا لە لایەن و بەرپرسانی پەیوەندییدار دەکەن کە وڵامی داوکانیان لەوانە بەرزکردنەوەی مووچە، هاوسانسازی هەروەها خوێندن بە زمانی دایکی بدەنەوە بەڵام نەک وڵامیان نەدراوەتەوە بەڵکوو سەرکوتیش کراون.