بە پێشنیاری سینەماکارێکی کورد گەورەترین پڕۆژەی سینەمای گەشتیاری لە سلێمانی درووست دەکرێت

پەیامی کورد    ...  بە پێشنیاری سینەماکارێکی کورد گەورەترین پڕۆژەی سینەمای گەشتیاری لە سلێمانی درووست دەکرێت .

بە پێی هەواڵ و زنیارییەکان سینەماكارێكی كورد پێشنیاری پرۆژەیەكی موتوربەكراوی سینەما و گەشتیاری لەشاری سلێمانی دەخاتەروو كە لەسە ڕووبەری ٢٥ هەزار دۆنم زەوی بنیات دەنرێت و تێچوەكەشی دەگاتە ٢ ملیار دۆلار.
هاوار مستەفا خان خاوەنی پرۆژەی گەشتیاری و سینەمای یەڵماز گونەیراگەیاند: پرۆژەی سینەما و گەشتیاری یەڵمازگونەی  موتوربەكردنی دوو كەرتی زۆر گرینگە وەك سینەما و گەشتیاری، بەمەبەستی گەشەپێدانیان بۆ ماوەی دووساڵ سەرقاڵی داڕشتنی ئەم پرۆژەیە بووم،  بۆ ئەوەی سەرنجی كۆمپانیاكان رابكێشین بەمەبەستی وەبەرهێنان، بە پرۆژەی تەمەن ناوی دەبەم چوونكە ٥ ساڵی تەمەنی خۆم تەرخان دەكەم بۆ درووستكردنی پرۆژەكە بەو شێوازەی داڕێژراوە.
وتیشی: لەپاش ٣٣ ساڵ لە كۆچكردنی یەڵماز هاتم ئەم پرۆژەیەم داڕشت بۆ شاری سلێمانی لەسەر ڕووبەری ٢٥ هەزار دۆنم زەوی بینا دەكرێت و ١٠٠ هەڵبژاردەی جیاوازی تێدا دەبێت، دەتوانرێت تێیدا هەزار هەلی كار برەخسێنێت، هەروەها پرۆژەكە دەیان ستۆدیوی سینەماش لەخۆ دەگرێت.
هاوار مستەفا خان روونیشیكردەوە: ڕووبەری پرۆژەكە دەگاتە ٥ ئەوەندەی پاركی هەواری شار بۆیە كێشەی شوێنمان هەیە لەئێستادا هەوڵ دەدەین شوێنێكی باشی بۆ دابینبكرێت بۆ ئەوەی لە وەرزی زستان گرفتی سەردانیكردن درووست نەبێت، پێشبینیش دەكەم بە گوژمەی ٢ ملیار دۆلار بۆ ماوەی ٥ ساڵ درووست بكرێت، دەزانین بڕەكەی زۆرە بەڵام  لەسلێمانی زیاتر لە ٥ هەزار ملیۆنێر هەیە هەروەها یەكێتی ئەورووپا یاخود لەرێگای پشكەوە هاووڵاتیان بەشداربن، تا پارەكە زیاتر بێت ماوەی درووستكردنی پرۆژەكە كەمتر دەبێتەوە.