سەرۆکی یەکیتی پەرلەمانتارانی کوردستان ... دەبێ لایەنەکان بە پێی قەبارەی خۆیان داواکاری پۆست بن لە حکوومەتی نوێ

سەرۆكی یەكێتی پەرلەمانتارانی كوردستان رایگەیاند، ھەنگاوەكان بەرەو كاراكردنەوەی سەرۆكایەتی ھەرێمی كوردستان و پێكھێنانی حكوومەتی نوێی ھەرێم زۆر باشن و پێویستە پەلەی لێ بكرێت و چیتر پێكھێنانی حكوومەت دوا نەخرێت.

نیعمەت عەبدوڵڵا  سەرۆكی یەكێتی پەرلەمانتارانی كوردستان ، ڕایگەیاند : "ئەو ھەنگاوانەی بۆ پێكھێنانی حكوومەتی ھەرێمی كوردستان و كاراكردنەوەی سەرۆكایەتی ھەرێمی كوردستان دەنرێن، زۆر باشن و پێویستە چیتر پێكھێنانی حكوومەت دوا نەكەوێت و دامەزراوە حكوومییەكان بكەنەوە سەر كاری خۆیان لە كابینەی نوێدا، چوونكە خەڵكی كوردستان بە ئومێدەوە سەیری گۆڕانكارییەكانی حكوومەتی داھاتووی ھەرێمی كوردستان دەكات".

عەبدوڵڵا گوتیشی: "ئەو ھەنگاوانەی دەنرێن بۆ كاراكرنەوەی سەۆكایەتی ھەرێمی كوردستان، لە چوارچێوەی ھەنگاوەكانی پێكھێنانی حكوومەتی ھەرێمیشن، بۆیە پێویستە ھەنگاوەكان بەردەوام بن و ھەنگاوی دیكەشیان بە دوادا بێت، كە لە بەرژوەندیی خەڵكی كوردستان بێت و گرینگیشە ھەموو لایەنەكان پێكەوە ھەنگاوەكان بنێن و ھەر یەكەو بەپێی قەبارەی خۆی داوای پۆست بكات و سازش بۆ یەكتری بكەن".

سەرۆكی یەكێتی پەرلەمانتاران باسی لەوەش كرد، پێویستە ڕەچاوی ئەنجامی ھەڵبژاردنەكان بكرێت لە پێكھێنانی حكوومەتی ھەرێمی كوردستاندا و ئەمە گرنگیی زۆری ھەیە، چوونكە خەڵكی كوردستان دەنگی بە لایەنەكان داوە و دەبێ حیساب بۆ ئەوانە بكرێت دەنگی زۆریان ھێناوە، بەڵام گرنگە لایەنەكان ھەر چۆنێك بێت بگەنە رێككەوتن، چونكە جگە لە رێككەوتن، ڕێگای دیكەیان لە پێش نییە.

دەشڵێ: "ناكرێ لەوە زیاتر حكوومەت دوا بخرێت، لەبەر ئەوەی لەسەر ئاستی نێودەوڵەتییش بۆ ھەرێمی كوردستان باش نییە، بۆیە با حكوومەت دروست بكرێت و دواتر دەتواندرێت ھەر كێشەیەك ھەبێت، لایەنەكان لە نێوان خۆیاندا چارەی بكەن".