٣ کوژراو و ٥٥ بریندار.. گرووپە چەکدارەکانی دیمەشق بۆ بڵاوەپێکردنی خۆپیشاندانی جەماوەری لە شارەکانی سووریا دەستێوەردانیان کرد

پەیامی کورد... ٣ کوژراو و ٥٥ بریندار.. گرووپە چەکدارەکانی دیمەشق بۆ بڵاوەپێکردنی خۆپیشاندانی جەماوەری لە شارەکانی سووریا دەستێوەردانیان کرد

سەرچاوە سوورییەکان ڕایانگەیاند، ٣ کەس کوژراون و نزیکەی ٥٥ کەسی دیکەش برینداربوون، کە لە نێویاندا ئەندامێکی هێزە ئەمنییەکان هەیە، ئەمەش لە کاتی ئەو خۆپیشاندانانەی شارەکانی لازقییە، تەرتووس، حومس و حەما بەخۆیانەوە بینی، کە تێیدا داوای مافی چارەی خۆنووسین و فیدراڵیزم دەکرا.

بەپێی ئەو سەرچاوانە، خۆپیشاندانەکان بە بەشداری هەزاران کەس بەڕێوەچوون و لە چەند ناوچەیەکدا، بەتایبەتی لە لازقییە، جەبلە و تەرتووس، بە تەقەکردن، بەکارهێنانی گازی فرمێسکڕێژ و هێرشکردن بە چەکی سارد ڕووبەڕووی خۆپیشاندەران بوونەتەوە، ئەمەش بووەتە هۆی برینداربوونی ژمارەیەک کەس کە باری تەندروستی هەندێکیان بە مەترسیدار وەسف دەکرێت.

سەرچاوەکان ئاماژەیان بەوەش کردووە کە هێزە ئەمنییەکان و گرووپە چەکدارە دڵسۆزەکانی "دەسەڵاتی ڕاگواستن" بە زەبری هێز بۆ بڵاوەپێکردنی ناڕەزایەتییەکان دەستێوەردانیان کردووە، هاوکات بڵاوەپێکردنی چڕی هێزە ئەمنییەکان و ئۆتۆمبێلی سەربازی لە چەند شارێکدا دۆخەکەی ئاڵۆزتر کردووە.

لەو بارەیەوە، ئەنجومەنی باڵای ئیسلامی عەلەوی لە سووریا و هەندەران بەیاننامەیەکی بڵاوکردەوە و تێیدا ئەو کارانەی بە "سەرکوتکردنی سیستماتیک" ناوبرد کە ڕووبەڕووی هاووڵاتیانی سڤیلی بێدەسەڵات بووەتەوە، جەختیشی کردەوە کە ئەوەی ڕوویداوە پێشێلکارییەکی زەقی یاسا مرۆییەکان و پەیماننامە نێودەوڵەتییەکانە کە مافی ڕادەربڕین و خۆپیشاندانی ئاشتییانە دەستەبەر دەکەن.

لە بەیاننامەکەدا هاتووە: "دەسەڵاتی ئەمری واقیع ڕووە سەرکوتکەرەکەی خۆی ئاشکرا کرد و سەلماندی کە نوێنەرایەتی دەوڵەت ناکات و ڕێز لە بنەماکانی ناگرێت، چونکە بە هەموو شێوەکانی تیرۆر و ترساندن، لە کوشتن و تەقەکردن و شێلانی خەڵک و دەستگیرکردن و سەرکوتکردن، ڕووبەڕووی داواکارییە ڕەواکانی گەل بووەوە."

بەیاننامەکە ئاماژەی بەوەش کردووە کە ئەوەی ڕوویداوە "بێدەنگی کۆمەڵگەی نێودەوڵەتی شەرمەزار دەکات، و بەرپرسیارێتی ئەخلاقی و یاسایی دەخاتە ئەستۆی هەموو ئەو لایەنانەی کە چاوپۆشی لەم پێشێلکارییانە دەکەن."