نەتەوە یەکگرتووەکان: پێشبینی دەکەین لە ساڵی ٢٠٢٦دا نزیکەی ملیۆنێک پەنابەری سووری بگەڕێنەوە

پەیامی کورد... نەتەوە یەکگرتووەکان: پێشبینی دەکەین لە ساڵی ٢٠٢٦دا نزیکەی ملیۆنێک پەنابەری سووری بگەڕێنەوە

نوێنەری کۆمیساریای باڵای نەتەوە یەکگرتووەکان بۆ کاروباری پەنابەران (UNHCR) لە سووریا، ئێوارەی دوێنێ شەممە ڕایگەیاند کە پێشبینی دەکرێت لە ماوەی ساڵی ٢٠٢٦دا نزیکەی ملیۆنێک پەنابەری سووری بگەڕێنەوە وڵاتەکەیان.

گۆنزالۆ ڤارگاس یۆسا ڕایگەیاند: "نزیکەی ١.٣ ملیۆن پەنابەری سووری لە کانوونی یەکەمی ٢٠٢٤ەوە بە کردەیی گەڕاونەتەوە وڵاتەکەیان، جگە لە نزیکەی دوو ملیۆن کەس لە ئاوارە ناوخۆییەکان کە گەڕاونەتەوە بۆ ناوچە ڕەسەنەکانی خۆیان."

یۆسا لە چاوپێکەوتنێکدا لەگەڵ ئاژانسی "ئانادۆڵو" وتی: "ئەمە بەو مانایەیە کە زیاتر لە ٣ ملیۆن سووری لە ماوەیەکی کورتدا گەڕاونەتەوە ناوچەکانیان لە وڵاتێکدا کە جەنگ لە ڕووی ئابووری، ژێرخان و خزمەتگوزارییەکانەوە دایڕزاندووە."

ئاماژەی بەوەش کرد کە لە ٨ی کانوونی یەکەمی ٢٠٢٤ەوە، پەنابەرە سوورییەکان بە شێوەیەکی سەرەکی لە تورکیا، لوبنان و ئوردنەوە گەڕاونەتەوە، و بە ڕێژەیەکی کەمتر لە میسر و عێراقەوە.

نوێنەری کۆمیساریاکە ڕوونیکردەوە کە خەمڵاندنەکان نیشانی دەدەن ساڵی داهاتوو "ڕەنگە گەڕانەوەی نزیکەی ملیۆنێک کەسی دیکە بەخۆیەوە ببینێت، ئەمەش واتە زیاتر لە ٤ ملیۆن سووری لە ماوەی دوو ساڵدا دەگەڕێنەوە."

هەروەها وتی: "ئەم قەبارە گەورەیەی گەڕانەوە لە بارودۆخێکی زۆر سەختدا ئەنجام دەدرێت، ئەمەش وادەکات پشتیوانی دارایی نێودەوڵەتی ببێتە پرسێکی بەپەلە و یەکلاکەرەوە بۆ مسۆگەرکردنی سەقامگیری و ڕێگریکردن لە خراپتربوونی قەیرانە مرۆییەکان."

لە کۆتاییدا ئاماژەی بەوە کرد کە زیاتر لە چارەکی گەڕاوەکان بەڵگەنامە سەرەکییەکانی وەک ناسنامەی کەسی یان بەڵگەنامەی خاوەندارێتییان (سەنەد) لەبەردەستدا نییە.