داوا لە هاووڵاتییان دەکرێت چەکەکانیان ڕادەستی حکومەت بکەنەوە

پەیامی کورد... داوا لە هاووڵاتییان دەکرێت چەکەکانیان ڕادەستی حکومەت بکەنەوە

ڕێبەر ئەحمەد وەزیری ناوخۆی حکومەتی هەرێمی کوردستان ڕایگەیاند: مۆڵەتدانی چەک بە ئەلکترۆنی دەکەین و داوا دەکەین ئەو هاووڵاتیانەی پێویستیان بەچەک نییە ڕادەستی حکومەتی بکەنەوە.

لە پرێس کۆنفرانسێکدا ڕێبەر ئەحمەد وەزیری ناوخۆی حکومەتی هەرێم ڕایگەیاند: بنکەی پۆلیس تەرخان دەکەین هەر هاووڵاتییەک بیەوێت چەکەکەی ڕادەستی حکومەت بکاتەوە یاخود بیکاتە مۆڵەتە دەتوانێت لەو بنکەیە ڕادەستی بکاتەوەو هانی هاووڵاتییان دەدەین ئەوەی پێویستی بەچەک نییە ڕادەستی بکاتەوە.

وتیشی: شوێنەکانی چەک فرۆشتن داخران دواتر بەپێی ڕێنمایی ڕێک دەخرێنەوە مۆڵەتیان پێ دەدرێت و بە ئەلکترۆنی بە سەنتەرێکەوە دەبەسترێنەوە، بەپێی ڕێکارەکان مۆڵەت دەدرێت بەو هاووڵاتیی چەک هەڵدەگرێت، ئەم بابەتەی دیجیتاڵکردنە لە پرۆسەدایە و ڕەنگە دوو مانگێکی تری بوێت.

ڕێبەر ئەحمەد وتیشی: داوا لە لایەنە سیاسییەکان دەکەین لەجیاتی دابەشکردنی چەک دەتوانن پەرتووکێک بدەنە ئەندامی حیزبەکانیان، بەداخەوە بەهۆی دۆخی نالەباری عێراق و هەرێمەوە هاووڵاتییان هەمووی چەکدار بوە ئەوکات خۆبەخشانە بەرگریان لە هەرێم کردوە ئەو چەکانە مۆڵەتدار نین ئێستا تا ڕادەیەک ئەو شەڕە نییە بۆیە پێویستە هاوکار بن و ڕادەستی بکەنەوە، ئەگەر حیزبەکانیش هاوکار بن ئەو کێشەیە چارەسەر دەبێت.