بڕیارێکی گرینگ بۆ هەموو ئەو زەوییانەی کە کارتین دەرکرا

پەیامی کورد     ...    بڕیارێکی گرینگ بۆ هەموو ئەو زەوییانەی کە کارتین دەرکرا

حكوومەتی ھەرێمی كوردستان بڕیاری داوە پەلە بكرێت لە پرۆسەی تاپۆكردنی زەوی كارت و جێگری پارێزگاری ھەولێریش دەڵێ، لە سنووری ھەولێر پرۆسەی تاپۆكردنی زەویی كارت بەردەوامە و ھەموو زەوییەكان تاپۆ دەكرێن.

مەسعوود كاڕەش، جێگری پارێزگاری ھەولێر، ڕایگەیاند: "ساڵانی پێشوو لەلایەن حكوومەتی ھەرێمی كوردستانەوە ژمارەیەكی زۆر زەوی بەسەر ھاووڵاتییاندا دابەش كراوە، بەڵام زەوییەكان بە شێوەی كارت دابەش كرابوون و تاپۆ نەكرابوون، ئەوەش كێشەی بۆ ھاووڵاتییان دروست كردبوو، چونكە نەیاندەتوانی ئەو زەوییانەی بە شێوەی كارتن، بەكار بێنن."

جێگری پارێزگاری ھەولێر گوتیشی: "تەنیا لە سنووری پارێزگای ھەولێر نزیكەی ١٠٠ ھەزار پارچە زەوی كارت تاپۆ كراون و بڕیارە ئەوانەشی ماون تاپۆ بكرێن، پرۆسەی تاپۆكردنی زەویی كارتیش لە سنووری شاری ھەولێر بەردەوامە و دوای تاپۆكردنیان، مۆڵەتی دروستكردنی خانووشیان پێ دەدرێت."

كاڕەش ئاماژەی بۆ ئەوەش كرد: "تاپۆكردنی زەوی كارت یەكێكە لە ھەنگاوەكانی حكوومەت بۆ ئەوەی كێشەی زەوی كەمتر بكرێتەوە و ھاووڵاتییان بتوانن بۆ دروستكردنی خانوو بەكاری بێنن، فەرمانگەكانی تاپۆش بە ھەماھەنگی لەگەڵ فەرمانگەكانی دیكەی حكوومەت، ڕۆژانە سەرقاڵی پرۆسەی تاپۆكردنی ئەو زەوییانەن كە ھێشتا بە شێوەی كارت ماون و بە تەواوبوونیان ھیچ زەوییەكی كارت نامێنێت و ھەموویان دەكرێنە تاپۆ."