هەژارترین ناوچەی عێراق دەستنیشان كرا

پەیامی کورد... هەژارترین ناوچەی عێراق دەستنیشان كرا

سەرۆكی دەستەی پاراستنی كۆمەڵایەتی وەزارەتی كارو كاروباری كۆمەڵایەتی عێراق ڕایگەیاند، ژمارەی ئەو كەسانەی لە وڵاتدا چاودێری كۆمەڵایەتی دەیانگرێتەوە دەگەنە حەوت ملیۆن كەس و مانگانە مووچەكانیان پێدەدرێت.

(ئەحمەد خەڵەف) سەرۆكی دەستەی پاراستنی كۆمەڵایەتی وەزارەتی كارو كاروباری كۆمەڵایەتی عێراق بە میدیا ناوخۆییەكانی ڕاگەیاندووە، ژمارەی ئەو كەسانەی لە وڵاتەكەمان چاودێری كۆمەڵایەتی دەیانگرێتەوە دەگەنە حەوت ملیۆن كەس و مانگانە مووچەكانیان پێدەدرێت. لە بەشێكی دیكەی قسەكانیدا ئەحمەد خەڵەف باسی لەوە كردووە، ناوچەی (كەحلا) لە پارێزگای میسان و (جەبایش) لە پارێزگای زیقاڕ وەكو هەژارترین ناوچەكانی عێراق دەستنیشان كراون.

ئەوەشی خستۆتەڕوو، لە ئێستادا (45) هەزار خێزانی ئاوارە لەلایەن پاراستنی كۆمەڵایەتییەوە مووچەیان پێدەدرێت وەكو هاوكارییەك و بە مەبەستی دابینكردنی بژێویی ژیانی ڕۆژانەیان، كە لە دۆخێكی خراپدان و ئاوارە بوون.

ئەوەش لە كاتێكدایە، عێراق یەكێكە لە وڵاتە بەرهەمهێنەرو هەناردەكارە گەورەكانی نەوت لە جیهان، بەڵام وەك چاودێران دەڵێن، بەهۆی بوونی گەندەڵی و خراپ بەڕێوەبردن نەتوانراوە ژیانێكی شایستە بۆ دانیشتووانی عێراق بە گشتی دابین بكرێت.