ئەمریکا و عێراق لەسەر کۆتاییهێنان بە ئەرکی هاوپەیمانی نێودەوڵەتی لە عێراق کۆدەبنەوە

وتەبێژی فەرماندەی گشتی هێزە چەکدارەکانی عێراق ڕایگەیاند، لیژنەکانی عێراق و ئەمریکا لەسەر کۆتاییهێنان بە ئەرکی هاوپەیمانی نێودەوڵەتی کۆبوونەوە.

ئەمڕۆ پێنجشەممە، لیوا یەحیا ڕەسوڵ وتەبێژی فەرماندەی گشتی هێزە چەکدارەکانی عێراق ڕایگەیاند، ئەو سێ لیژنە لاوەکییەی کە لە لیژنەی باڵای سەربازی بۆ کۆتاییهێنان بە ئەرکی هاوپەیمانی نێودەوڵەتی پێکهێنرابوو، لەگەڵ هاوتاکانیان لە هاوپەیمانی نێودەوڵەتی کۆبوونەوە.

ئەوەشی خستەڕوو، لە کۆبوونەوەکەدا تاوتوێی چەند تەوەرێک لە خشتەی کارەکان کرا بۆ هەڵسەنگاندنی مەترسی تیرۆر و دۆخی ژینگەی ئۆپەراسیۆنەکان و هەروەها میکانیزمەکانی بەهێزکردنی توانا سەربازییەکانی هێزە ئەمنییەکانی عێراق.

هەروەها ڕاشیگەیاند، لیژنەکان کۆ نووسییان پێشکەش کرد بۆ ئەوەی دەرفەتی پڕکردنەوەی پێداویستییەکانی پلانی کۆتاییهێنان بە ئەرکی هاوپەیمانی نێودەوڵەتی بڕەخسێت و پەیوەندییەش ڕاگوزەر بکات بۆ پەیوەندی دوولایەنە لەگەڵ وڵاتانی ئەندامی هاوپەیمانێتییەکە.