شانەى راگەیاندنى ئەمنیى عێراق: لە تەقینەوەکەى بنکەى سەربازى کالسۆ ئەندامێکى حەشدى شەعبى کوژراوە

شانەى راگەیاندنى ئەمنیى عێراق رایگەیاند، لە تەقینەوەکەى شەوى رابردووى بنکەى سەربازى کالسۆ ئەندامێکى حەشدى شەعبى کوژراوە و هەشت ئەندامى هێزە ئەمنییەکان بریندارن.

شانەى راگەیاندنى ئەمنیى عێراق دەشڵێت، "بەگوێرەى راپۆرتى بەرگریى ئاسمانى هیچ فڕۆکەیەکى جەنگى و فڕۆکەیەکى بێفڕۆکەوان لەپێش و دواى تەقینەوەکە لە ئاسمانى بابل نەسوڕاوەتەوە."

شەوى 19 لەسەر 20ـى نیسانى 2024، دەنگى تەقینەوەیەکى بەهێز لە پارێزگای بابل بیسترا و بەگوێرەى زانیارییەکان، پاش هێرشەکە ژمارەیەک فڕۆکەى بێفڕۆکەوانى جۆراوجۆر کە گومان دەکرێت ئەمریکى بن بەسەر ئاسمانى ناوچەکە و پارێزگاکانى بەغداد و کەربەلاشدا سوڕاونەتەوە، زانیارییەکان باسلەوەدەکەن کە بارەگای حەشدى شەعبى لە سەربازگەکە کراوەتەئامانج

بەگوێرەى زانیارییەکان، تەقینەوەکە لە بارەگای سەرۆکایەتی ئەرکان و هەردوو لیوای 28 و 17ـى حەشدی شەعبی و گەنجینەکانی چەک و تەقەمەنی لە سەربازگەى کالسۆ روویداوە