هێڵەكانی گواستنەوەی ناو شار بە مەرجی تەندرووستی دەكرێنەوە

پەیامی کورد     ...    بەڕێوبەری گشتی وەزارەتی گواستنەوەی حكوومەتی هەرێمی كوردستان گوتی، پێشنیازی هەموو پارێزگاكان پێشكەشی وەزارەتی گواستنەوە كراوە بۆ ئەوەی هێڵی گواستنەوەی ناو شار بكرێتەوە و دەشڵێ: "ئێمە تاوتوێی دەكەین و دواتریش لە ماوەیەكی نزیكدا بە مەرج و ڕێنمایی تەندرووستی هێڵەكانی گواستنەوە دەكرێنەوە".

سەڵاح جەوهەر، بەڕێوبەری گشتی وەزارەتی گواستنەوەی حكوومەتی هەرێمی كوردستان رایگەیاند: "هەموو پارێزگاكان داوایان پێشكەش كردووە كە هێڵەكانی گواستنەوە بكەونەوە كار و، ئێمەش داواكارییەكان لە وەزارەت تاوتوێ دەكەین و لە ماوەیەكی نزیكدا وەڵامیان دەدەینەوە بۆ ئەوەی بكەونەوە كار".

ناوبراو باسی لەوەش كرد: "بە مەرج و رێنمایی تەندرووستی سەرەتا تەنها هێڵەكانی ناو شار دەكرێنەوە و جارێ هێڵەكانی دیكە ناكرێنەوە، ئەویش پێویستە ماسك ببەستن و دەستكێشیان لە دەست بێت، هەروەها بەردەوامیش ناو ئۆتۆمبێل بڕشێنن و سەرنشینەكانیش لە یەك دوور بن و زۆر سەرنشین سواری ئۆتۆمبێلەكانیان نەكەن".