پەیامێک لە نێچیرڤان بارزانی یەوە سەبارەت بە پڕۆسەی دەنگدان

پەیامی کورد   ...   پەیامێک لە نێچیرڤان بارزانی یەوە سەبارەت بە پڕۆسەی دەنگدان

نێچیرڤان بارزانی، جێگری سەرۆکی پارتی دەڵێت: مێژوو و خەباتی پارتی لەپێناو گەلی کوردستان بە ھەموو پێکھاتەکانیەوە دیار و ئاشکرایە، لە ھەر کوێ پارتی ھەبێت ئاسایش، ئاوەدانی و بونیادنان ھەیە.

١٠ـی تشرینی یەکەمی ٢٠٢٤، نێچیرڤان بارزانی، جێگری سەرۆکی پارتی، لەبارەی ھەڵبژاردنی خولی شەشەمی پەرلەمانی کوردستانەوە پەیامێکی بڵاو کردەوە و ئاماژەی بەوە دا، ھاووڵاتی ئازیز ٢٠ـی ئۆکتۆبەر دەنگ بدە بەو لیستەی کە خزمەت بە تۆ و کوردستان دەکات، دەنگ بدەن بە لیستی ١٩٠ـی پارتی دیموکراتی کوردستان.

جێگری سەرۆکی پارتی، دەڵێت: مێژوو و خەباتی پارتی لەپێناو گەلی کوردستان بە ھەموو پێکھاتەکانییەوە دیار و ئاشکرایە، لە ھەر کوێ پارتی ھەبێت ئاسایش، ئاوەدانی و بونیاتنان ھەیە، پێشکەوتن و گەشانەوە ھەیە، لە سایەی پارتی دا سەر و ماڵی ھەمووان پارێزراوە، خاوەن کاران و کاسباکاران بە خەیاڵێکی ئاسوودە کاری خۆیان کردووە، لە کار، ژیانی خۆیان، ماڵ و منداڵیان دڵنیابوون.

ھاوکات ڕایگەیاند، پارتی حزبی کار و کردارە، حزبی بەرپرسیارەتییە نەک حزبی قسە و درووشمی بەتاڵ، قسە و بەڵێنی بێ بنەما ئاسانە بە ھەموو لایەک دەکرێت، بەس ھەموو لایەک وەک پارتی ئەھلی کار و کردار نین، پارتی مننەتی کار و خزمەت بەسەر خەڵکەوە ناکات، خزمەتکردن ئەرک و شانازییە بۆ پارتی، چوونکە پارتی واتە خزمەت، پارتی واتە ئاسایش، ئاوەدانی، ژیان و پێشکەوتن.

ناوبراو ڕاشیگەیاند، پارتی واتا پاراستنی کوردستان و دەستکەوتەکانی، واتا مسۆگەرکردنی پێکەوەژیان و یەکترقبوڵکردن و لێبووردەیی. پارتی بەرگریی لە مافی ھەموو پێکھاتە ئایینی و نەتەوەیی یەکان دەکات، وێڕای ھەموو سەختی و ڕێگرییەکان، پارتی زۆر دەستکەوتی گەورەی بۆ ھەرێمی کوردستان بەدەست ھێناوە و، ھێشتاش زۆریش ماوە بیکات.

نێچیرڤان بارزانی، جەختی لەوە کردەوە، پارتی چاوی لە متمانە و پشتگیری خەڵکی کوردستانە و بۆ ئەوەی لە کار و خزمەتکردن بەردەوام بێت، بۆ ئەوەی کەموکوڕی و کێشەکان چارە بکات.

جێگری سەرۆکی پارتی، داوایەکی تایبەتی ئاراستەی ھاووڵاتییان کرد و ووتی: ھاووڵاتی ئازیز بۆ ئەوەی کار و خزمەت بەردەوام بێت، بۆ ئەوەی کێشەکان چارە بکرێن، بۆ پاراستنی ئارامی و سەقامگیری، بۆ بەردەوامی پێشکەوتن، سەرکەوتن و پاراستنی کوردستان بۆ ئێستا و داھاتوو، دەنگ بدەن بە لیستی ١٩٠ـی پارتی دیموکراتی کوردستان. ووتیشی: پشت بە خوا و ئیرادەی گەلی کوردستان پارتی سەردەکەوێت و کوردستانیش سەردەکەوێت.