پاڤڵ تاڵەبانی وەک سەرۆکی یەکیتی نیشتیمانی پەیامێکی گرینگ بڵاو دەکاتەوە

پەیامی کورد     ...   پاڤڵ تاڵەبانی وەک سەرۆکی یەکیتی نیشتیمانی پەیامێکی گرینگ بڵاو دەکاتەوە

بافڵ تاڵەبانی لەسەر گۆڕی رێبەری کۆچکردو مام جەلال پەیامێکی بۆ یەکێتییەکان و خەڵکی کوردستان بڵاوکردەوە و رایگەیاند، "بەناچاری دوای ھەوڵی بەردەوامم و کۆشش لەپێناو یەکێتییەکەمان و پارێزگاری لە رێبازی راست و رەوان و بەڕاوێژ لەگەڵ سەرکردە تێکۆشەرەکان و خەمخۆرانی یەکێتی راستەقینە بڕیاری گۆڕانکاریی ریشەییمدا لە سەرپەرشتیارانی ھەمو ئەو دامەزراوە ئەمنی و حزبییانەی ساڵانێک بو خرابونە خزمەت بەرژەوەندی هەندێک کەسەوە و بۆ تەسفیاتی حیزبی بەکاردەھێنران"، دەشڵێت، "دەست خرابوە بینەقاقای کاروکاسبی کاسبکاران و سەرمایەداران بەپیلان و بەرنامە رێگری لە دامەزراوەکانی حکومەت دەکرا تاوەکوو کار و پڕۆژەکانیان جێبەجێنەکەن".

بافڵ تاڵەبانی، کە وەک سەرۆکی یەکێتی نیشتمانی کوردستان خۆی ناساندوە ئەمڕۆ پێنجشەممە لە پەیامێکدا بەناونیشانی "باوکە گیان رێنیشاندەر و رابەری مێژوییمان" رایگەیاندوە، "ئەمڕۆ ھاتوومەتە حزورت تا لەنزیکەوە خۆم راستییەکانت پێبگەیەنم و دڵنیات بکەمەوە لە پشوودرێژی و دانبەخۆداگرتنم لەبەرامبەر پاراستنی یەکێتی ناو یەکێتی و ئەمانەتی خوێنی شەھیدان، رەنج و ماندوبونی پێشمەرگەی دێرین، تێکۆشەرانی رێگای خەبات و زیندانیانی سیاسی، کەمئەندامانی سەنگەر و قوربانیدانی کۆمەڵانی خەڵک".

ئاماژەی بەوەشکردوە، "دواجار بەناچاری دوای ھەوڵی بەردەوامم و کۆشش لەپێناو یەکێتییەکەمان و پارێزگاری لە رێبازی راست و رەوان و بەڕاوێژ لەگەڵ سەرکردە تێکۆشەرەکان و خەمخۆرانی یەکێتی راستەقینە بڕیاری گۆڕانکاریی ریشەییمدا لە سەرپەرشتیارانی ھەمو ئەو دامەزراوە ئەمنی و حزبییانەی ساڵانێک بو خرابونە خزمەت بەرژەوەندی هەندێک کەسەوە و بۆ تەسفیاتی حیزبی بەکاردەھێنران و دژی بەرژەوەندییە باڵاکانی گەلەکەمان و یەکێتییەکەمان دەجووڵانەوە، لەکاتێکدا کارمەندانی ئەو دەزگایانە خەڵکانی تێکۆشەر و دڵسۆزبون، بەڵام بەمەبەست ئەم کارە دزێوانەیان پێئەنجام دەدرا، دەست خرابوە بینەقاقای کاروکاسبی کاسبکاران و سەرمایەداران، بەپیلان و بەرنامە رێگری لە دامەزراوەکانی حکوومەت دەکرا تاوەکوو کار و پڕۆژەکانیان جێبەجێنەکەن، قاچاخچێتی، سەرانەوەرگرتن، ھەڕەشە و سیخوڕیکردن کرا بە بەرنامە".

بافڵ تاڵەبانی باسی لەوەشکردوە، "دواجار گلەیی و گازندەی کۆمەڵانی خەڵک، نوسەران، رۆژنامەنوسان، رۆشنبیران و مامۆستایانی زانکۆ و دڵسۆزان و ناوەندە دیبلۆماسییەکان و کەسوکاری سەربەرزی شەھیدان ھەمووی بەھەند وەرگیران و بڕیارە دروستەکەمان دا لەبەرامبەر یاساشکێنان".

ئەوەشی خستوەتەڕو، ئەمڕۆ لەسەر مەزارەکەت بەڵێن دەدەین یەکێتی ئەمانەتە و بە گیانمان دەیپارێزین، جەخت دەکەمەوە داھاتوی یەکێتی پرشنگدارتر دەبێت و ھیچ کەس حەدی نییە و زاتی ئەوە ناکات جارێکیتر سیخوڕ نەک بخاتە ناو ماڵی مام جەلال بگرە لەناو کۆمەڵانی خەڵک و دامەزراوەکانی حکومەت و رێگەنادرێت ئەم کارە نەشیاوانە بکرێن و دەبێت لەمەودوا دامەزراوە ئەمنییەکان و دەزگای زانیاری لەخزمەت ئاسایشی ھەرێم و پاراستنی سەروماڵی خەڵک و فەراھەمکردنی ژینگەیەکی لەبار بێت بۆ کاروکاسبی و ژیانی ھەموان".

بافڵ تاڵەبانی نوسیویەتی، "بەڵێن بێت، بەڵێن لەئاست گەورەیی یەکێتی و سەروەری خاکی ھەرێم بم بۆ پارێزگاریکردن لەمافەکانی خەڵک و بەرژەوەندی گشتی و یەکێتییەکان و تێکۆشەران و کەسوکاری شەھیدان".