ئێران خوێندن بە زمانی چینی لە قوتابخانەکان دەخاتە بواری جێبەجێ کردنەوە

پەیامی کورد ... ئێران خوێندن بە زمانی چینی  لە قوتابخانەکان دەخاتە بواری جێبەجێ کردنەوە

بەرپرسێکی وەزارەتی پەروەردە و بارهێنانی حکوومەتی ئێران وتوویەتی، زمانی چینی وەک زمانەکانی دیکە بە قوتابیانی ئێرانی دەوترێتەوە.

"عەلی موحێبی" سەرپەرەستی پلاندارێژیی وانەکان لە وەزارەتی پەروەردە و بارهێنانی حکوومەتی ئێران  وتوویەتی، لە ساڵی داهاتووی خوێندندا زمانی چینی لە قوتابخانەکانی ئێران دەچێتە بواری جێبەجێ کردنەوە و بۆ ئەو مەبەستە ئامادەکاریمان کردووە.

ناوبراو وتنەوەی زمانی چینی و عەرەبی لە قوتابخانەکانی ئێرانی وەک "حەقی هەڵبژاردنـ"ـێک بۆ قوتابیان وەسف کردووە.

"موحێبی" لە درێژەدا ئاماژەی بەوە کردووە وتنەوەی زمانە بیانییەکان یەکێک له ١١ تەوەرە سەرەکاییەکانی پەروەردە و بارهێنانە لە بەرنامەی کاریی ئێمەدا.

وتنەوەی ئەو زمانانە لە قوتابخانەکانی ئێران لە حاڵێکدایە کە زمانی نەتەوەکانی نیشتەجێی ئەو وڵاتە یەک لەوان کورد هێشتاش قەدەغەیە و ئیزنی پێنادرێت لە قوتابخانەکان بوترێتەوە.