سەرۆکوەزیرانی هەرێمی کوردستان و سەرۆکی پەرلەمانی عێراق دۆخی ووڵاتیان بە گشتی خستە بەر باس و تاوتوێ کردن

پەیامی کورد  ...     نێچیرڤان بارزانی سه‌رۆك وه‌زیرانی هه‌رێمی كوردستان و محه‌مه‌د ئه‌لحه‌لبووسی سه‌رۆكی په‌رله‌مانی عێراق، دۆخی سیاسی عێراق به‌گشتی و دوایین پێشهاته‌كانی پارێزگای مووسڵیان به‌تایبه‌تی تاوتوێ كرد و جه‌ختیان له‌ گرینگی هاوكاری و هه‌ماهه‌نگی نێوان لایه‌ن و ده‌زگا په‌یوه‌ندیداره‌كانی ووڵات بۆ ئاوه‌دانكردنه‌وه‌ی ناوچه‌ زیانبه‌ركه‌وتووه‌كانی شه‌ڕی داعش كرده‌وه‌.

له‌ كۆبوونه‌وه‌یه‌كدا كه‌ سه‌رله‌به‌یانی ئه‌مڕۆ سێشه‌ممه‌ 23/4/2019 له‌ هه‌ولێر به‌ڕێوه‌چوو و تیایدا  د. ڤالا فه‌رید سه‌رۆكی په‌رله‌مانی كوردستان و ژماره‌یه‌ك له‌ به‌رپرسان ئاماده‌ی بوون، هه‌ردوولا دۆخی ئاواره‌كانی عێراقیان له‌ كه‌مپه‌كانی هه‌رێمی كوردستان خسته‌ به‌ر باس و لێكۆڵینه‌وه‌‌ و جه‌ختیان له‌سه‌ر گرنگیی هاوكاریكردنیان له‌لایه‌ن حكوومه‌تی عێراق و كۆمه‌ڵگه‌ی نێوده‌وڵه‌تییه‌وه‌ كرده‌وه‌ بۆ ئه‌وه‌ی بتوانن بگه‌ڕێنه‌وه‌ شوێنه‌كانی خۆیان و ناوچه‌ زیانبه‌ركه‌وتووه‌كان ئاوه‌دان بكرێنه‌وه‌.

په‌یوه‌ندییه‌كانی هه‌ولێر ـ به‌غدا، به‌رده‌وامی گفتوگۆ بۆ چاره‌سه‌ركردنی كێشه‌كانیان له‌ڕێگه‌ی دیالۆگه‌وه،‌ تاوتوێكردنی دۆخی ناوچه‌كه‌ و چه‌ند پرسێكی دیكه‌، به‌شێكی دیكه‌ی كۆبوونه‌وه‌كه‌ بوون.