ئەڵمانیا سیستەمی بەرگریی ئاسمانی بۆ ئۆکراینا دابین دەکات

پەیامی کورد... ئەڵمانیا سیستەمی بەرگریی ئاسمانی بۆ ئۆکراینا دابین دەکات

ڕاوێژکاری ئەڵمانیا ڕایگەیاند، "لەبارەی ئامانجەکانی جەنگەوە مشتومڕ دەکرێت، ئامانجی ئێمە ئەوەیە پووتین سەرکەوتوو نەبێت و ئۆکراینا خۆی بەرگری لە خۆی بکات و سەربکەوێت".

ڕاوێژکاری ئەڵمانیا، ئۆلاف شۆڵتز لەمیانی کۆبوونەوەکانی پەرلەمانی فیدراڵی ئەڵمانیا لەبارەی بودجەوە، ڕایگەیاند وڵاتەکەی بە تەواوی تواناکانییەوە بەردەوام دەبێت لە پشتیوانیکردنی ئۆکراینا و گوتی: "نابێت سەرۆکی ڕووسیا، ڤلادیمیر پووتین بە ئامانجەکانی بگات".

ڕاوێژکاری ئەڵمانیا جەختی لەوە کردەوە کە وڵاتەکەی هاوشێوەی هاوکاری دارایی و ئابووری بە چەکیش پشتیوانی ئۆکراینای کردووە و بڕیاریشیان داوە سیستەمی بەرگریی ئاسمانی جۆری Iris-T کە پێشکەوتووترین سیستەمی بەرگریی ئاسمانییە بۆ ئۆکراینا دابین بکەن و گوتی: "بەم جۆرە دەتوانرێت شارێکی گەورەی ئۆکراینا لە هێرشە ئاسمانییەکانی ڕووسیا بپارێزرێت".

ناوبراو تیشکیشی خستە سەر ئەوەی کە جگە لەمەش، سیستەمی ڕاداری مۆدێرن دەدەن بە ئۆکراینا و لەگەڵ هۆڵەندادا پێشکەوتووترین تۆپهاوێژەکان بۆ ئۆکراینا دابین دەکەن.

ئۆلاف شۆڵتز جەختی لەوە کردەوە کە پێویستە پووتین لەو جەنگەدا سەرکەوتوو نەبێت و گوتی: "لەبارەی ئامانجەکانی جەنگەوە مشتومڕ دەکرێت. ئامانجی ئێمە ئەوەیە پووتین سەرکەوتوو نەبێت و ئۆکراینا خۆی بەرگری لە خۆی بکات و سەربکەوێت".