دەستبەسەرکرانی زیاتر لە ٤٠ مامۆستا لە ڕۆژهەڵاتی کوردستان

پەیامی کورد... دەستبەسەرکرانی زیاتر لە ٤٠ مامۆستا لە ڕۆژهەڵاتی کوردستان

لە شارەكانی ڕۆژهەڵاتی كوردستان لەماوەی دوو ڕۆژی كۆتایی هەفتەی ڕابردوودا زیاتر لە 40 مامۆستا دەستبەسەركراون، هەڵمەتەكە هاوكاتە لەگەڵ ئەو خۆپیشاندان و ناڕەزایەتییانەی لە ئێران بەڕێوەدەچن.

ڕێكخراوی مافی مرۆڤی هەنگاو ڕایگەیاند، هاوکات لەگەڵ ناڕەزایەتیی مامۆستایانی قوتابخانەكان، شارەکانی (سنە، مەریوان، سەقز و دیواندەرە) لەلایەن هێزە ئەمنییەکانەوە بە سەربازگە کراون و هێڵەکانی تەلەفۆن لە شاری دیواندەرە تووشی کێشە بووە.

دەشڵێت، هێزە ئەمنییەکان و هێزەکانی یەکەی تایبەت لە شاری سنە چەندین کەسیان لە مامۆستایانی ناڕازییان داوەتە بەر لێدان و کوتان. هەروەها لە بەرەبەیانی پێنجشەممەشەوە چەندین هەلیکۆپتەر بە سەر ئاسمانی شارەکانی سنە، سەقز و بۆکان سوڕاونەتەوە.

ڕێكخراوەكە دەڵێت، نیوەڕۆی پێنجشەممە زیاتر لە 20 كەس لە هێزەکانی ئیدارەی ئیتلاعاتی سنە هەڵیانکوتاوەتەسەر ماڵی سەلاح حاجی میرزایی ئەندامی دەستەی بەڕێوەبەریی ئەنجومەنی پیشەیی مامۆستایانی کوردستان لقی سنە _ کەڵاتەرزان و دەستبەسەریان کردووە. هەروەها غەیاس نێعمەتی ئەندامی دەستەی بەڕێوەبەریی ئەو ئەنجومەنە و بێهزاد قەوامی ئەندامی ئەنجومەنەکە دەستبەسەرکراون.

هاوکات لانیکەم پێنج کەس لە مامۆستایانی شاری سەقز لە کاتی ناڕەزایەتی دەربڕین لە پێش بینای فەرمانگەی پەروەردە و بارهێنانی ئەو شارە لەلایەن هێزە ئەمنییەکانەوە دەستبەسەرکراون. شەوی پێشتریش 18 کەس لە مامۆستایانی ئەو شارە دەستبەسەرکراون.

بەپێی ڕێكخراوی هەنگاو هەر شەوی چوارشەممە سێ کەس لە مامۆستایانی مەریوانی و ئەندامی ئەنجومەنی پیشەیی مامۆستایانی ئەو شارە لەلایەن هێزەکانی ئیدارەی ئیتلاعات دەستبەسەرکراون.

ڕوونیشیكردووەتەوە، پێنج مامۆستای دیکەی مەریوانی بانگ کراون بۆ ئیدارەی ئیتلاعات و بۆ ماوەی چەندین کاتژمێر لێپرسینەوەیان لەگەڵ کراوە و دواتر بە نووسراو بەڵێنییان لێوەرگیراوە کە بەشداری ناڕەزایەتییەکانی ڕۆژی پێنجشەممەی مامۆستایان نەکەن.

لە دیواندەرە-ش پێنج كەس لە ئەندامانی ئەنجومەنی پیشەیی مامۆستایان دەستبەسەرکراون.

لە كۆتاییدا ڕێكخراوی مافی مرۆڤی هەنگاو ژمارەی مامۆستایانی بەپێی شارەكان دیاریكردووە و دەڵێت، (سەقز 21، دیواندەرە 5، مەریوان 9 و سنە 9 )مامۆستا دەستبەسەركراون.