ئەنجومەنی ئاسایشی نیودەوڵەتی تەقینەوەکانی بەغدای شەرمەزار کرد

پەیامی کورد ... ئەنجومەنی ئاسایشی نیودەوڵەتی تەقینەوەکانی بەغدای شەرمەزار کرد

ئه‌نجومه‌نی ئاسایشی نێوده‌وڵه‌تی پاڵپشتی بۆ عێراق له‌ شه‌ڕی دژی تیرۆر دووپات كردەوە و ته‌قینه‌وه‌كانیش سه‌ركۆنه‌ ده‌كات.

له‌ به‌یاننامه‌یه‌كدا ئه‌نجوومه‌نی ئاسایشی نێوده‌وڵه‌تی سه‌ركۆنه‌ی ته‌قینه‌وه‌كانی به‌غدای كرد، كه‌ لە رۆژی پێنجشه‌ممه‌ی رابردوو،‌ 142 كوژران و برینداربوون.

ئه‌نجوومه‌نی ئاسایش دووپاتیشیكردەوە،‌ تیرۆر به‌ هه‌موو شێوه‌كانییه‌وه،‌ یه‌كێكه‌ له‌ مه‌ترسیدارترین هه‌ڕه‌شه‌كان بۆ سه‌ر ئاشته‌وایی و ئاسایشی نێوده‌وڵه‌تی.  داواشی له‌ ته‌واوی وڵاتان كرد، بۆ به‌ره‌نگاربوونه‌وه‌ی تیرۆر به‌ شێوه‌یه‌كی كارا له‌گه‌ڵ حكومه‌تی عێراق هاوكاربن.

ئه‌نجومه‌نی ئاسایشی نێوده‌وڵه‌تی جه‌ختیشی له‌وه‌ كردووه‌، هه‌ر كرده‌وه‌یه‌كی تیرۆریستی، كارێكی تاوانكارییه‌ و بێ پاساوه‌، ئه‌مه‌ش به‌ بێ ره‌چاوكردنی پاڵنه‌ره‌كان و لایه‌نی ئه‌نجامده‌ری كرده‌وه‌ تیرۆریستییه‌كه‌.