واشینتۆن هۆشداری دەدات

پەیامی کورد   ...    دوای هێرشكردنه‌ سه‌ر باڵیۆزخانه‌ی ئه‌مریكا له‌ به‌غدا، واشینتۆن هۆشداری ده‌داته‌ ئه‌و هاووڵاتیانه‌ی كه‌ ده‌یانه‌وێت گه‌شتی عێراق بكه‌ن و یه‌كه‌م ئامۆژگاریشی ئه‌وه‌یه‌ كه‌ تا ده‌كرێت گه‌شت نه‌كه‌ن.

وه‌زاره‌تی ده‌ره‌وه‌ی ئه‌مریكا ئه‌مڕۆ پێنجشه‌ممه‌ 2/1/2020، ئاستی هۆشداری بۆ ئاستی 4 به‌رزكردووه‌ته‌وه‌ و نووسیویه‌تی: "گه‌شت بۆ عێراق مه‌كه‌ن".

له‌ لیستی ئامۆژگارییه‌كانیش له‌ ئاستی چواره‌می هۆشدارییدا ئاماژه‌ به‌وه‌ كراوه‌، كه‌ به‌ر له‌وه‌ی هاووڵاتیانی ئه‌مه‌ریكا گه‌شت بۆ ئه‌و شوێنه‌ بكه‌ن، پیویسته‌ وه‌سیه‌تنامه‌ بنووسن و میراتگرانی دیاریبكه‌ن.

پێشتریش باڵیۆزخانه‌ی ئه‌مریكا ئاگاداری هاووڵاتیانی ووڵاته‌كه‌ی كرده‌وه‌ كه‌ له‌ عێراقن، كاره‌كانی باڵیۆزخانه‌ راگیراوه‌ و بۆ هه‌ر كارێك بگه‌ڕێنه‌وه‌ كۆنسوڵخانه‌ی ئه‌و وڵاته‌ له‌ هه‌ولێر.

رۆژی 31/12/2019، لایه‌نگرانی حه‌شدی شه‌عبی و حیزبۆڵڵای عێراق، له‌ به‌رده‌م باڵیۆزخانه‌ی ئه‌مریكا له‌ ناوچه‌ی سه‌وزی به‌غدا گردبوونه‌وه‌ و دواتریش هه‌ڵیانكوتایه‌ سه‌ر باڵیۆزخانه‌كه‌.

هۆكاره‌كه‌شی بۆردومانكردنی چه‌كدارانی حیزبوڵڵایه‌ به‌ فڕۆكه‌ی بێفڕۆكه‌وان له‌لایه‌ن ئه‌مه‌ریكاوه‌، كه‌ رۆژی 29/12/2019 پێگه‌كانی ئه‌و گرووپه‌ی له‌ سه‌ر سنووری نێوان عێراق و ئێران بۆردومان كردبوو و به‌هۆیه‌وه‌ ٢٨ چه‌كدار كوژران و ٤٨ی دیكه‌ش برینداربوون.