گەورەترین بنکەی ئاسمانی ئەمریکا لە قەتەر گەورەتر و بەهێزتر دەکرێت

پەیامی کورد    ...    بنکەی سەربازی ئەمریکا لە قەتەر بە نزیکەی سێ بەرابەری ئێستا فراوانتر و گەورەتر دەبێت لە بواری بەرفراوانی و کوالێتیییەوە .

بە پێی هەواڵ و زانیارییەکان بنکەی ئاسمانی ئەمریکا ، العدید لە قەتەر ، کە گەورەترین بنکەی ئاسمانی ئەم ووڵاتەیە لە ڕۆژهەڵاتی ناوەڕاست دا ، گەورەتر و بەهێزتر دەکرێت .

واشینتۆن پۆست لەمبارەوە نووسیویەتی ، قەتەر ڕەزامەندی خۆی دەربڕیوە و بۆ بەهێز کردن و گەورەترکردنی ئەم بنکەیە بڕی ١ میلیارد و ٨٠٠ میلیۆن دۆلاری ئەمریکی یارمەتی دەدات .

بەرپرسانی سەربازی ئەمریکا ڕایانگەیاند : ئەم بنکە ئاسمانییە لە دوای گەورەتر بوون توانای لەخۆگرتنی ١٠٠٠٠ سەربازی ئەمریکی دەبێت . فەرماندەی ئەمریکی دانیال توولی یش هەروەها ڕایگەیاند : ئێستا ئۆپراسیۆنی سەربازی ئەمریکا لە بنکەی ولعدید وەکوو بەرزبوونەوەی ئاستی شەڕی عێراق و ئەفغانستان ئاڵۆزە و کەل و پەلی لە ڕادەبەدەری پێشکەوتوو و گرانبەها وەکوو فڕۆکەی شەڕکەری ئێف - ٢٢ و بۆمب هاوێژی بی -٢٢ و بی - ٥٢ بۆ ئەم بنکە ئاسمانییە نێردراون .