سەرۆک بارزانی پەیامێک بڵاو دەکاتەوە

پەیامی کورد    ...    سەرۆك بارزانی، په‌یامێكی پیرۆزبایی ئاراسته‌ی یه‌كیتی زانایانی ئائینی ئیسلامی كوردستان ده‌كات به‌ بۆنه‌ی ساڵیادی دامه‌زراندنیانه‌وه‌. 

بەناوی خودای مەزن و دلۆڤان

بەبۆنەی چل و نۆیەمین ساڵیادی دامەزراندنی یەكیتی زانایانی ئائینی ئیسلامی كوردستان، پیرۆزبایی خۆم ئاراستەی سەرۆك و ئەندامانی مەكتەبی تەنفیزی و ئەنجوومەنی ناوەندی یەكیتی زانایانی ئائینی ئیسلامی كوردستان و مامۆستایان و هەموو گەورە زانایانی ئائینی ئیسلامی كوردستان دەكەم.

دامەزراندنی یەكیتی زانایانی ئائینی ئیسلامی كوردستان لەسەر دەستی جەنابی بارزانی نەمر هەنگاوێكی كاریگەر بوو بۆ یەكخستن و پەرەپێدانی ڕۆڵی مامۆستایانی ئایینی لە شۆڕش و ژیانی سیاسی و كۆمەڵایەتی خەڵك و پتەوكردنی بنەماكانی پێكەوەژیان و خواناسی لە كوردستان. مامۆستایانی ئائینی لە هەموو قۆناغەكاندا ئەو ڕۆڵەیان زۆر بە شاییستەیی گێڕاوە و ئەرك و ماندووبوونیان جێگەی ڕێزی هەموو لایەكە.

پێزانینم هەیە بۆ هەڵوێست و ڕۆڵی مامۆستایانی ئائینی بەڕێزی كوردستان لە ڕووبەڕووبوونەوەی هزری توندڕەوی و گومڕایی و، هەروەها پاڵپشتیكردنی دۆزی ڕەوای گەلی كوردستان و دەستخۆشییان لێ دەكەم.

لەو بۆنەیەدا هیوای سەركەوتن بۆ هەموو مامۆستا و گەورە زانایانی ئائینی ئیسلامی كوردستان دەخوازم و خودای مەزن پشت و پەنای هەموومان بێت.

مسعود بارزانی

21ـی 9ـی 2019