مەسروور بارزانی پەیامێکی گرینگ بڵاو دەکاتەوە

پەیامی کورد    ...     مەسرور بارزانی سەرۆكی حكومەتی هەرێمی كوردستان لە پەیامێكدا لە ساڵیادی شاڵاوەكانی ئەنفال، داوای بنبڕكردنی ئەو هزرە شۆڤێنی و رەگەزپەرستییە دەكات كە لە پشت ئەنجامدانی تاوانی جینۆسایدی ئەنفالن.
سەرۆكی حكومەتی هەرێم لە پەیامەكەیدا رایگەیاند، یادكردنەوەی ئەو تاوانە مەزنانەی بەرانبەر بە خەڵكی كوردستان و بەبەرچاوی جیهان ئەنجامدران و هەزاران كەسی بێتاوانی تیادا بوون بە قوربانی، نابێت تەنها یادكردنەوەیەكی ئاسایی ئازارەكانمان بێت، بەڵكوو دەبێت بە هەموو شێوەیەك هەوڵی بنبڕكردنی ئەو هزرە شۆڤێنی و رەگەزپەرستییە بدرێت، كە لە پشت ئەنجامدانی تاوانی جینۆسایدی ئەنفالن و زۆربەی ناوچەكانی كوردستانی گرتەوە و زامێكی قوڵ و لەیادنەكراویشە لە جەستە و یادەوەری گەلی كوردستاندا.
مەسرور بارزانی لە بەشێكی دیكەی پەیامەكەیدا دەڵێت ''حكومەتی هەرێمی كوردستان لەكاتێكدا درێژە بە هەوڵەكانی دەدات بۆ بەنێودەوڵەتیكردنی كەیسی ئەنفالەكان و بە جینۆسایدناساندنی، بەردەوام پەرۆشی باشتركردنی ژیان و گوزەرانی كەسوكاری شەهیدان و قوربانیانی شاڵاوەكانی جینۆسایدی ئەنفالە".

هەروەها جەختدەكاتەوە، پێویستە دەوڵەتی عیراق بەرپرسیارێتی دەستوری و ئاكاریی خۆی لە قەرەبوكردنەوەی ئەو تاوانە مەزنانە لەئەستۆبگرێت و دڵنیایی دوبارە نەبونەوەشیان لەداهاتودا بدات.