ئەو ئۆتۆمبێلانە لە کاتژمێر ١١ ی بەیانی تا ٥ ی ئێوارە هاووڵاتییان بەخۆڕایی دەگوازێتەوە

پەیامی کورد     ...     بەڕێوبەرایەتی شارەوانی هەولێر ڕایگەیاند، ژمارەیەک ئۆتۆمبێلی گۆڵف بۆ ناو بازاڕی هەولێر دابین كراوە، بەخۆڕایی هاووڵاتییان دەگوازێتەوە.

عەبدولواحید ئەحمەد سەرۆكی شارەوانی هەولێر، ڕایگەیاند : "ئێستا كە رێی هاتووچۆی ئۆتۆمبێل لەناو سەنتەری شار و چواردەوری بازاڕی قەیسەری داخراوە، بە پێویستمان زانی ئاسانكاری بۆ هاتووچۆی هاووڵاتییان بكەین.

زیاتر گوتی: کاتژمێر ١١ی پێش نیوەڕۆی ئەمڕۆ لە بازاڕی گەورەی هەولێر دادەنرێت و هاووڵاتییان بەخۆڕایی دەتوانن لێی سوودمەند بن.

ئۆتۆمبێلەکان لە جۆری ئەو ئۆتۆمبێلە بچووکانەن کە لە گۆڕەپانی گۆڵفدا بەکار دێن و بە ئۆتۆمبێلی گۆڵف لە دنیادا ناسراون.

سەرۆكی شارەوانیی هەولێر گوتی،  ئەم جۆرە ئۆتۆمبێلانە دۆستی ژینگەن و بە كارەبا كار دەكەن، دەنگ و دووكەڵیان نییە، خێرایی یەەكەیان كۆنترۆڵ كراوە و سیمایەكی جوانیان هەیە كە لەگەڵ ناوەندی شار دەگونجێت.

عەبدۆلواحید ئەحمەد باسی لەوەش كردووە، رۆژانە ئەو ئۆتۆمبێلە لە خزمەتی هاووڵاتییان دەبێت لە کاتژمێر ١١ ی بەیانی تا ٥ ی ئێوارە.