شاندێکی باڵای تاڵیبان بە فەرمی بانگهێشتی کۆماری ئیسلامی ئێران دەکرێن

پەیامی کورد     ...    شاندێکی باڵای تاڵیبان بە فەرمی بانگهێشتی کۆماری ئیسلامی ئێران دەکرێن

ووتەبێژی تاڵیبان ڕایگەیاند، شاندێکی ئەو گرووپە بە بانگهێشتی فەرمی دەسەڵاتی ئێران لەو ووڵاتەیە و هاوکات شاندێکی دەوڵەتی ئەفغانستانیش گەیشتووەتە تاران.

دوێنێ چوارشەممە ڕێکەوتی ٧ی جووڵای ٢٠٢١ شاندێکی دەوڵەتی ئەفغانستان و شاندێکی گرووپی تاڵیبان، گەیشتوونەتە تارانی پایتەخت و لەگەڵ کاربەدەستانی کۆماری ئیسلامی کۆبوونەتەوە.

موحەمەد نەعیم، ووتەبێژی تاڵیبان بە ‘بی بی سی’ ڕایگەیاند: ئەم شاندە بە بانگهێشتی فەرمی دەسەڵاتی ئێران لە تارانە، شاندەکە بە سەرۆکایەتی ‘شێرموحەمەد عەباس ئۆستانکەزی’ جێگری دەستەی دانووستانکاری تاڵیبان لەگەڵ کاربەدەستانی کۆماری ئیسلامی ، گفتوگۆ دەکات.

وەزارەتی دەرەوەی کۆماری ئیسلامییش ڕایگەیاندووە: ئەم بانگهێشتە بۆ دانووستانەکانی “ئەفغانی-ئەفغانی”ـە کە، بە ئامادەبوونی نوێنەرانی دەوڵەتی ئەفغانستان، شاندی باڵای سیاسی تاڵیبان و بە مێوانداری کۆماری ئیسلامی لە بینای وەزارەتی دەرەوە بەڕێوەدەچێت.

هەریەک لە موحەمەد جەواد زەریف وەزیری دەرەوەی ئێران و ڕەسول مووسەوی سکرتێری گشتی ڕۆژئاوای ئاسیای وەزارەتی دەرەوەی ئێران لەو دانیشتنەدا ئامادەن.

تا ئێستا لەسەر ناوەڕۆکی دانیشتنەکە و ئامانجەکانی هیچ ڕوونکردنەوە و ڕاگەێندراوێک بڵاونەکراوەتەوە.