بانگهێشتی ئۆپۆزیسیۆنی ئێران بۆ کۆنفڕانسی ئەمنییەتیی مۆنیخ

پەیامی کورد... بانگهێشتی ئۆپۆزیسیۆنی ئێران بۆ کۆنفڕانسی ئەمنییەتیی مۆنیخ

بڕیار وایە کە کۆنفڕانسی ئەمنییەتیی مۆنیخ هاوکات لەگەڵ ساڵڕۆژی هێرشی سەربازیی ڕووسیە بۆ سەر ئۆکراین، لە ئاڵمان بەڕێوە بچێت و لەجێی بەرپرسانی کۆماری ئیسلامی، ئۆپۆزیسیۆنی ئێرانی بانگهێشت دەکرێن.

ڕۆژی سێشەممە ٧ی فێبریوەری ٢٠٢٣، "کریستۆ هۆیزگێن"، بەڕێوەبەری کۆنفڕانسی مۆنیخ، وتی: لەجێی بەرپرسانی کۆماری ئیسلامی، نوێنەرانی ئۆپۆزیسیۆنی ئێران بانگهێشت کراون بۆ کۆنفڕانسە ئەمنیەتییەکە و هەرچەندە بەڕێوەبەرانی پێشووتری ئەم کۆنفڕاسە لەسەر ئەوە جەختیان کردووەتەوە کە بەرپرسانی کۆماری ئیسلامیش بەشدار بن، بەڵام بەهۆی پێشێلکردنی یاسای نێودەوڵەتی و هێرشی دڕندانەی سپای پاسداران و پۆلیسی ئێران بۆ سەر گەلانی وەزاڵەهاتووی ئێران، هیچ بانگهێشتنامەیەک بۆ بەرپرسانی ڕێژیم نەنێردراوە.

ناوبراو لە درێژەدا وتیشی: بڕیاردەرانی ئەو کۆنفڕانسە، دەوڵەتی ڕووسیەشیان بانگهێشتی کۆنفڕانسەکە نەکردووە، لەبەر ئەوەیکە نایانهەوێت کۆنفڕانسی ئەمنیەتیی مۆنیخ ببێتە تریبۆنێک بۆ تەبلیغاتی ڕووسیە و ئەم کۆنفڕاسە لە ٢٨ بۆ٣٠ی ڕێبەندان لە وڵاتی ئاڵمان بەڕێوە دەچێت.

ڕێبەرانی زیاتر لە ٤٥ وڵاتی جیهان، ٥٠ وەزیری دەرەوە و ٣٠ وەزیری بەرگری و ئۆپۆزیسیۆنی ئێرانی بۆ ٥٩هەمین دەورەی کۆنفڕانسی ئەمنییەتیی مۆنیخ بانگهێشت کراون.