سه‌رۆكى هه‌رێمى كوردستان و نێرده‌ى ئه‌مه‌ريكا بۆ هاوپه‌يمانيى نێوده‌وڵه‌تى كۆبوونه‌وه‌

پەیامی کورد … سه‌رۆكى هه‌رێمى كوردستان و نێرده‌ى ئه‌مه‌ريكا بۆ هاوپه‌يمانيى نێوده‌وڵه‌تى كۆبوونه‌وه‌

ڕۆژی هه‌ينى نێچيرڤان بارزانى سه‌رۆكى هه‌رێمى كوردستان پێشوازى له‌ جان گادفره‌ى نێرده‌ى تايبه‌تی ئه‌مه‌ريكا بۆ هاوپه‌يمانيى نێوده‌وڵه‌تيى شەڕی دژى داعش به ‌وه‌كاله‌ت و شاندێكى ياوه‌رى كرد.

له‌ كۆبوونه‌وه‌يه‌كدا دوايين په‌ره‌سه‌ندنه‌كانى به‌ره‌نگاربوونه‌وه‌ى تيرۆر و هه‌ڕه‌شه‌ و جموجۆڵه‌كانى داعشيان له‌ عێراق تاوتوێ كرد و جه‌ختيان له‌ پێويستيى چڕكردنه‌وه‌ى هه‌وڵه‌كان و هاريكارى و ميكانيزمێكى كاراى هه‌ماهه‌نگيى نێوان سوپای عێراق و پێشمه‌رگه‌ به‌ پشتگيريى هێزه‌كانى هاوپه‌يمان بۆ له‌ناوبردنى يه‌كجاره‌كيى داعش، به‌تايبه‌تى له‌ ناوچه‌كانى بۆشايي ئه‌منى كرده‌وه‌.

هه‌ردوولا كۆك بوون له‌وه‌ى به‌رده‌واميى په‌لاماره‌كانى داعش هه‌ڕه‌شه‌ى ڕاسته‌قينه‌‌ و مه‌ترسيى جددين بۆ ئاسايش و ئاراميى عێراق و سووريا، ڕۆژهه‌ڵاتى ناوه‌ڕاست و ناوچه‌كه‌ و ته‌نانه‌ت بۆ وڵاتانى ئەفريقاش، بۆيه‌ داكۆكييان له‌وه‌ كرده‌وه‌ كه‌ شه‌ڕى دژى داعش و توندڕه‌وى به‌ ته‌نيا له‌ ڕێگه‌ى سه‌ربازييه‌وه‌ نابێت، به‌ڵكو ده‌بێ ڕێگه‌ له‌ هۆكاره‌كانى سه‌رهه‌ڵدانى تيرۆر و توندڕه‌وى بگيرێت.

له‌مباره‌يه‌وه‌ ئاماژه‌ به‌ دۆخى كه‌مپى هۆل له‌ سووريا كرا و جه‌خت له‌ پێويستيى كاركردن بۆ ڕێگرى له‌ زه‌مينه‌ى توندڕه‌وى كرايه‌وه‌.

گرنگيى يارمه‌تيدان و هاوكاريكردنى گه‌ڕانه‌وه‌ى ئاواره‌كانى شه‌ڕى داعش بۆ شوێنه‌كانيان، دووباره‌بوونه‌ى به‌ئامانجگرتنى هێزه‌كانى ئه‌مه‌ريكا و هاوپه‌يمانان له‌ عێراق، هه‌وڵه‌كان و هاوبه‌شى و هاريكاريى هه‌مه‌لايه‌نه‌ بۆ پاراستنى ئارامى و سه‌قامگيرى له‌ ناوچه‌كه‌، دۆخى ئێستا و داهاتووى سووريا و پرسى كورد له‌و وڵاته‌، كۆنفرانسى هه‌فته‌ى داهاتووى وه‌زيرانى وڵاتانى هاوپه‌يمانيى نێوده‌وڵه‌تيى دژى داعش له‌ ڕۆما و چه‌ند پرسێكى ديكه‌ى‌ جێى بايه‌خى هاوبه‌ش، به‌شێكى ديكه‌ى كۆبوونه‌وه‌كه‌ بوون كه‌ كۆنسولى گشتيى ئه‌مه‌ريكا له‌ هه‌ولێر ئاماده‌ى بوو.