په‌یامى سه‌رۆكایه‌تی هه‌رێمى كوردستان بۆ یادى ئه‌نفالكردنى بادینان

په‌یامی کورد    ...  له‌ چوارچێوه‌ى شاڵاوى به‌دناوى ئه‌نفالدا كه‌ ساڵى 1988 له‌لایه‌ن ڕژێمى به‌عسه‌وه‌ به‌رامبه‌ر به‌ خه‌ڵكى سڤیلى هه‌رێمى كوردستان ئه‌نجام درا و تیایدا زیاتر له‌ (180) هه‌زار هاووڵاتی كوردستان بێسه‌روشوێن و شه‌هید كران و به‌ هه‌زاران دێهاتى كوردستان وێران بوون، ئه‌مڕۆ یادى ئه‌نفالكردنى بادینان ده‌كه‌ینه‌وه‌.

ئه‌نفالكردنى بادینان كه‌ كۆتایی شاڵاوى ئه‌نفاله‌كان بوو، له‌ 25ى ئابه‌وه‌ تا 6ى ئه‌یلوولى 1988 هه‌موو ناوچه‌كانى بادینانى گرته‌وه‌ و تیایدا كیمیاباران و گرتن و كوشتن و ڕاگواستن و وێرانكرنى مزگه‌وت و دێر و دێهات و ناوچه‌كانى بادینان له‌لایه‌ن پێنج فیرقه‌ى سه‌ربازییه‌وه‌ ئه‌نجام درا و ئه‌وانه‌یشى له‌و تاوانه‌ ڕزگاریان بوو، ئاواره‌ى ئێران و توركیا و په‌راگه‌نده‌ى وڵاتان بوون.

له‌ كاتێكدا به‌وپه‌ڕى ڕێز و شكۆوه‌ یادى شه‌هیدانى ئه‌نفالكردنى بادینان و ته‌واوى شه‌هیدانى كوردستان ده‌كه‌ینه‌وه‌، جارێكى دیكه‌ داوا له‌ حكوومه‌تى عێراق ده‌كه‌ین به‌پێى بڕیارى دادگاى باڵاى تاوانه‌كانى عێراق كه‌ شاڵاوه‌كانى ئه‌نفالى به‌ تاوانى دژى مرۆڤایه‌تى و جینۆساید و جه‌نگ ناساندووه‌، ئه‌ركى یاسایى و ئه‌خلاقی خۆى جێبه‌جێ بكات و قوربانییانى ئه‌نفال قه‌ره‌بوو بكاته‌وه‌، هه‌روه‌ها حكوومه‌تى هه‌رێمى كوردستانیش ڕاده‌سپێرین كه‌ خزمه‌تكردنى زیاترى قوربانییانى ئه‌نفال و به‌دواداچوونى چاره‌نووسى ونبووان بكاته‌ یه‌كێك له‌ ئه‌وله‌ویاتى كاره‌كانى.

دروود و سڵاو بۆ گیانى پاكى شه‌هیدانى ئه‌نفالكردنى بادینان و هه‌موو ئه‌نفالكراوان و ته‌واوى شه‌هیدانى كوردستان.

سه‌رۆكایه‌تی  هه‌رێمى كوردستان

25/8/2019