ڕاهێنانی ​فڕۆکەوانە تورکەکان لەسەر فڕۆکەى F35 بە فەرمی لە لایەن وەزارەتی بەرگری ئەمریکاوە ڕاگیرا

پەیامی کورد   ...    وەزارەتی بەرگری ویلایەتە یەكگرتوەكانی ئەمریكا بە شێوەیەكی فەرمی ڕایگەیاند، مەشقەكانیان بە فڕۆكەوانە توركەكان ڕاگرتووە، كە لە ماوەی رابردودا لە لایەن ئەمریكاوە لەسەر سیستەمی F-35 مەشقیان پێدەكرا.

ئاژانسی ڕۆیتەرز بڵاویكردەوە، دوێنێ دووشەممە وەزارەتی بەرگری ئەمریكا " پێنتاگۆن" ، بە شێوەیەكی فەرمی مەشقەكانیان بە فڕۆكەوانە توركەكان ڕاگرتووە، كە لەماوەی رابردوودا لە ویلایەتی ئاریزۆنا-ی ئەمریکا لەسەر سیستەمی فڕۆكەی F-35 مەشقیان پێدەكرا.

لیوتنانت كۆڵۆنێڵ مایك ئاندروز، ووتەبێژی وەزارەتی بەرگری ویلایەتە یەكگرتوەكان لەمیانەی لێدوانێكدا رایگەیاند، "بەهۆی نەبوونی گۆڕانكاری لە سیاسەتی توركیا، لەبارەی كۆتاییهێنان بە بەشداریكردنیان لە بەرنامەی ئێف-35ی ئەمریكی لەگەڵ ئانکارا گفتوگۆ دەكەین".
پێشتریش وەزارەتی بەرگری ئەمریکا تا رێكەوتی 31ی تەمموز-ی ئەمساڵ موولەتی داوە بە حكومەتی ئانکارا، تا لە كرینی سیستەمی موشەكی s-400ی روسی بكشێتەوە، لەوبارەیەوە لە دەرەنجامەكانی هەنگاوەكان بۆ كرینی ئەو جۆرە مووشەكە هۆشداری داوە.
هەینی رابردو 7ی حوزەیران، ئێڵین لۆرد، یاریدەدەری وەزیری بەرگری ویلایەتە یەكگرتوەكان رایگەیاند "ئەگەر توركیا لە كرینی S-400 پەشیمان نەبێتەوە، ئەو  فرۆكەوانە توركانە دەردەكەین كە بە مەبەستی مەشق لەسەر فڕۆكەی F-35ی ئەمركیی لە وڵاتەكەدان".
لۆرد ووتیشی، "سەرجەم ئەو رێككەوتنانەش رادەگرین  بە مەبەستی درووستكردنی پارچەكانی فڕۆكەی F-35 ی ئەمریكی لە لایەن توركیاوە، لەگەڵ حكوومەتی ئەو ووڵاتە ئەنجاممانداوە"