داعش لەناو شاری كەركووك ئامادەی كردەوەی تیرۆریستییە

پەیامی کورد   ...    لە چەند رۆژی ڕابردوودا تیرۆریستانی داعش ژمارەیەك كردەوەی تیرۆریستییان لەناو سەنتەری شاری كەركووكدا ئەنجام دا، بەڕێوبەری ئاسایشی كەركووكیش پێی وایە، داعش لەنێو شاری كەركووكدا خۆی ئامادە كردووە و ھێزە ئەمنییەكانی شارەكەش ھیچ پلانێكیان بۆ بەرەنگاربوونەوەی پیلانەكانی داعش نییە.

عەمید ئیدریس رەفعەت، بەڕێوەبەری ئاسایشی كەركووك، رایگەیاند: "ڕەوشی ئەمنی شاری كەركووك ئاڵۆزە و ھۆكارەكەی بەشێكی بۆ بێدەسەڵاتیی دەزگا ئەمنییەكانی ئەو شارە دەگەڕێتەوە، ڕۆژانی ڕابردوو ژمارەیەك كردەی تیرۆریستی لە نێو شاری كەركووك روویان دا و چەند تەقینەوەیەك ئەنجام دران و  ھێرشیش كرایە سەر ھێزەكانی عێراقی لە بەردەم نەخۆشخانەی ئازادی، كە ژمارەیەك شەھید و برینداری لێ كەوتەوە".

بەڕێوبەری ئاسایشی كەركووك گوتیشی: "داعش بە شێوەیەكی باش توانیویانە خۆیان رێك بخەنەوە، بە تایبەتی لە سنووری قەزا و ناحیەكانی كەركووك بە شێوەی پارتیزانی بەنێو ناوچەكەدا دەگەڕێن و دەستی خۆیان دەوەشێنن، لەنێو سەنتەری شاری كەركووكیش شانەی نوستووی زۆری ھەیە، هەروەها بەپێی زانیاری ئێمە لە گەڕەكەكانی ناوەڕاست و خوارووی كەركووك تیرۆریستانی داعش خۆیان بۆ ئەنجامدانی كردەوەی تیرۆرستی ئامادە كردووە".

رەفعەت روونیشی كردەوە: "ئەو ھێزانەی لە كەركووكن و مەلەفی ئەمنیی شارەكەیان بەدەستەوەیە، خەڵكی ئەو ناوچەیە نین، لەبەر ئەوەش ھیچ پلانێكی ئەوتۆیان بۆ پاراستنی كەركووك و رەوشی ئەمنیی شارەكە نییە، خەڵكێك لە ئەندامانی ھێزە ئەمنییەكان لە دەرەوە ھاوردە كراون و باوەڕیان بە كۆنتڕۆڵكردنی رەوشی ئەمنیی كەركووك نییە، ھەر ئەوەش ھۆكارە ھاووڵاتیانی دانیشتووی كەركووك ھاوكار نەبن لەگەڵ ھێزە ئەمنییەكانی ئەو شارە و ھیچ ھەمانگییەك لە نێوان دەزگا ئەمنییەكان و ھاووڵاتیاندا نییە لە كەركووك".