حیزبی دیمۆکرات تاوانەکانی ڕێژیمی تاران مەحکووم دەکات و داوایەک ئاراستەی حکوومەتی عێراق دەکات

پەیامی کورد     ...    حیزبی دیمۆکرات تاوانەکانی ڕێژیمی تاران مەحکووم دەکات و داوایەک ئاراستەی حکوومەتی عێراق دەکات

حزبی دیموکراتی کوردستانی ئێران داوای لە حکوومەتی عێراقی فێدراڵ و هەرێمی کوردستان کرد لە بەرانبەر پێشێلکارییەکانی سوپای پاسداران بێدەنگ نەبن و هەڵوێست وەربگرن.

دەقی بەیانییەکە بەم چەشنیە:

بەیانییەی مەحکوومکردن

سەر لە بەیانی ڕۆژی ١٦ی جوونی ٢٠٢٠ی زایینی تۆپخانەکانی هێزی سوپای پاسدارانی ئێران بنکە و بارەگاکانی پێشمەرگەکانی حیزبی دیمۆکراتی کوردستانی ئێران لە شاخی قەندیل و سنووری ناوچەکانی حاجی عومەران، چۆمان و سیدەکانیان داوەتە بەر ئاوری تۆپخانەی قورس و کاتیۆشا باران. بەهۆی ئەم تۆپبارانە زیانێکی زۆر بە هاونیشتمانیانی ئەم ناوچەیە گەیشتووە و ماڵەکانیان وێران و خەڵکەکەی ئاوارە بوون.

 ئەم تاوانەی ڕێژیمی کۆماری ئیسلامی ئێران یەکەم جار نیە و بەردەوام بێ هیچ بیانوویەک خەریکی شێواندنی باری ئاسایشی ناوچە و ئاوارەکردنی هاوڵاتییان و زیان گەیاندنی مادی و ڕووحییە بە خەڵکی ئەو ناوچانە.

ئێمە وێڕای مەحکوومکردنی ئەم تاوانەی هێزەکانی ڕێژیمی کۆماری ئیسلامی ئێران، داوا لە ڕای گشتی و ڕێکخراوە مرۆڤدۆستەکان دەکەین کە ئەم کردەوە دژە مرۆئیەی ڕێژیم مەحکووم بکەن.

هەروەها داوا لە حکوومەتی عێراقی فێدراڵ و حکوومەتی هەرێمی کوردستانیش دەکەین لە بەرامبەر ئەم پێشێلکارییانەی سوپای پاسدارانی ئێران کە بە بێ هۆ هاووڵاتییان و سەروەت و سامانیانی کردووەتە ئامانجی تۆپخانەکانی هەڵویست بگرن و مەحکوومی بکەن و بێ دەنگ نەبن.

حیزبی دێموکراتی کوردستانی ئێران