فەرەنسا سەرکۆنەی هێرشەکەی سەر کێڵگەی گازیی کۆرمۆر دەکات

پەیامی کورد... فەرەنسا سەرکۆنەی هێرشەکەی سەر کێڵگەی گازیی کۆرمۆر دەکات


باڵیۆزخانەی فەرەنسا لە عێراق لە راگەیەندراوێکدا بەتوندی سەرکۆنەی هێرشەکانی سەر کێڵگەی گازیی کۆرمۆر دەکات و بە دەستدرێژییکردنە سەر سەقامگیریی ئاسایشی عێراق دەزانێت.

باڵیۆزخانەی فەرەنسا لە عێراق لە راگەیەندراوێکدا رایگەیاند: زۆر بە توندی ئیدانەی هێرشەکەی شەوی رابردووی سەر کێڵگەی گازیی کۆرمۆر دەکەین کە بووە هۆی کەوتنەوەی ئاگرێکی گەورە و پەکخستنی بەرهەمهێنانی کارەبا.

لە راگەیەندراوەکەی باڵیۆزخانەی فەرەنسادا ئەوەش هاتووە، “هێرشی هاوشێوە لە دژی ژێرخانێکی مەدەنی کە سوود بە هەموو عێراقییەکان دەگەیەنیت، دەستدرێژییەکی دیکەیە بۆسەر سەقامگیری عێراق و بەتایبەتی بۆسەر سەقامگیری هەرێمی کوردستان”.

ئەوەشخراوەتە روو، ئەم هێرشە پەرەپێدانی گرژییەکان لە ناوچەکە قبوڵنەکراوە. هەروەها باسیلەوەشکردووە، فەرەنسا هاوشانی گەلی عێراق و دەسەڵاتدارەکانیەتی هەروەک چۆن هاوشانی دەسەڵاتدارانی هەرێمی کوردستانی عێراق و دانیشتوانەکەیەتی.

شەوی رابردوو، ژمارەیەک کاتیۆشا لە کێڵگەی گازیی کۆرمۆر لە باشووری پارێزگای سلێمانی کەوتنە خوارەوە، یەکێک لە کاتیۆشاکان ئاراستەی کۆگایەکی ئەمبارکردنی گازیی سرووشتیی کێڵگەکە کرا و بووە هۆی کەوتنەوەی ئاگرێکی گەورە؛ وەزارەتی کارەبای حکومەتی هەرێمی کوردستان رایگەیاند، بەهۆی راگیرانی کارکردن لە کارگەکە و کەوتنەوەی ئاگرەکەی کێڵگەی کۆرمۆر، بەرهەمهێنانی کارەبا لە وێستگەکانی کارەبا لە هەرێمی کوردستان بە بڕی 2800 مێگاوات کەمیکردووە.