حکوومەتی هەرێمی کوردستان بە بۆنەی سەری ساڵی ئێزیدیان پەیامێکی بڵاو کردەوە

پەیامی کورد … حکوومەتی هەرێمی کوردستان بە بۆنەی سەری ساڵی ئێزیدیان پەیامێکی بڵاو کردەوە

د. جووتیار عادل، گوتەبێژی حکوومەتی هەرێمی کوردستان بەبۆنەی هاتنەوەی سەری ساڵی ئێزدییان و جەژنی چوارشەممەی سوور پەیامی حکوومەتی بڵاوکردەوە.

لە بەشێکی پەیامەکەدا هاتووە "کوردستانیانى ئازیز بە گشتى و خوشک و برایانى ئێزدی بەتایبەتى لەم چەند ساڵەى ڕابردوو بە دۆخێکى نەخوازراودا تێپەڕین و بەداخەوە دەستى ڕەشى تیرۆریستانى داعش خوازیارى نەهێشتنى هیوا و خۆشییەکان بوون لە هەرێمەکەمان، بەڵام ئەم هەورە ڕەشە بە سەروەرى و ئازایەتیى هێزی پێشمەرگە و هاوپەیمانان ڕاماڵدرا و تیشکى هیوا و ژیان گەڕایەوە بۆ هەمووان".

ئەمەی خوارەوە دەقی پەیامەکەیە:-

پەیامى حکومەتى هەرێمى کوردستان بە بۆنەى چوارشەممەی سوور و هاتنى ساڵى نوێى ئێزدی

ڕۆژی چوارشەممە ١٤ی نیسان، جەژنی "چارشەمبا سۆر" و سەری ساڵی ئێزدییەکانە، بۆیە پیرۆزباییەکى گەرم لە خوشک و برا ئێزدییەکانى کوردستان و جیهان دەکەین و هیوادارین ساڵێکی پڕ خۆشی و شادییان هەبێت.

کوردستانیانى ئازیز بە گشتى و خوشک و برایانى ئێزدی بەتایبەتى لەم چەند ساڵەى ڕابردوو بە دۆخێکى نەخوازراودا تێپەڕین و بەداخەوە دەستى ڕەشى تیرۆریستانى داعش خوازیارى نەهێشتنى هیوا و خۆشییەکان بوون لە هەرێمەکەمان، بەڵام ئەم هەورە ڕەشە بە سەروەرى و ئازایەتیى هێزی پێشمەرگە و هاوپەیمانان ڕاماڵدرا و تیشکى هیوا و ژیان گەڕایەوە بۆ هەمووان.

لەم چوارشەممە پیرۆزەدا پڕ بەدڵ نزا بۆ بەختەوەرى و سەلامەتى ئێزیدییەکان و ئەو کچە بێتاوانانە دەکەین کە بوونە قوربانى دەستى ڕەشى تیرۆریستان و ئاواتەخوازین هەموویان بگەڕێنەوە نێو خانەوادە و زێد و لالشى سەربەرز.

سەربارى هەموو ئەمانە، پەتاى کۆڕۆناش ژیانى هەموو دونیاى سست کردووە، بۆیە لەسەرمانە لە هەر قەرەباڵغى و جەژن و مەراسیمێکدا پابەندى ڕێنماییە تەندرووستییەکان بین تا لەم ڕێگەیەوە بتوانین بەردەوام لەگەڵ خۆشەویستانمان بین.

دووبارە بەخێر بێت سەرى ساڵى نوێى ئێزدی و تۆشەى لاوانیش پڕ لە چەپکى گوڵى جوانى بەهارى بێت بۆ بەردەم پەرەستگەکانى لالش.

د. جوتیار عادل

گوتەبێژی حکومەتی ھەرێمی کوردستان

١٣ی نیسانی ٢٠٢١