بەریتانیا دژی هێرشەكانی ئێران بۆ سەر هەرێمی كوردستان هاتە دەنگ

پەیامی کورد... بەریتانیا دژی هێرشەكانی ئێران بۆ سەر هەرێمی كوردستان هاتە دەنگ


كونسوڵی گشتیی بەریتانیا لە هەرێمی كوردستان، هێرشەكانی ئێران بۆ سەر هەرێمی كوردستان سەركۆنە دەكات و بە پێشێلكارییەكی بێ پاساوی سەروەریی عێراقی لە قەڵەم دەدات.

كەمێك لەمەوبەر لە تویتێكدا، دیڤد هانت، كونسوڵی گشتیی بەریتانیا لە هەولێر، رای گەیاند: ”بەریتانیا ئیدانەی هێرشە بەردەوامەکانی ئێران دەکات بۆ سەر هەرێمی کوردستانی عێراق کە پێشێلکارییەکی بێ پاساوی سەروەریی عێراقە“.

جەختیشی كردۆتەوە: ”بەداخەوەین بۆ گیان لەدەستدانی خەڵکی بێتاوان“.

هاوكات ئەوەی دووپاتكردۆتەوە كە بەریتانیا بەردەوامە لە پشتیوانیکردنی سەروەری و ئاسایشی عێراق، بە سەروەریی هەرێمی کوردستانیشەوە.

ئەمە لە كاتێكدایە كە لە بەیانیی ئەمڕۆوە تا ئامادەكردنی ئەم هەواڵە، كۆماری ئیسلامیی ئێران سێ جار بنكە و بارەگا و كەمپی كوردانی رۆژهەڵاتی لە ناوچەكانی (زڕگوێز) لە سلێمانی، پردێ و كۆیە لە هەولێر كردووە.