په‌رله‌مانی ئۆكرانیا بڕیاری سه‌پاندنی سزای بۆ ماوه‌ی 50 ساڵ به‌سه‌ر ئێراندا په‌سه‌ند كرد

پەیامی کورد... په‌رله‌مانی ئۆكرانیا بڕیاری سه‌پاندنی سزای بۆ ماوه‌ی 50 ساڵ به‌سه‌ر ئێراندا په‌سه‌ند كرد


په‌رله‌مانی ئۆكرانیا ئه‌و بڕیاره‌ی په‌سه‌ند كرد كه‌ بۆ ماوه‌ی 50 ساڵ سزای ئابووریی و سزای دیكه‌ به‌سه‌ر ئێراندا ده‌سه‌پێنێت.

له‌ راگه‌یه‌ندراوێكدا كه‌ له‌ ماڵپه‌ڕی په‌رله‌مانی ئۆكرانیادا بڵاوكراوه‌ته‌وه‌، ئاماژه‌ به‌وه‌كراوه‌، له‌ دانیشتنی په‌رله‌ماندا 10 یاسا، سێ پرۆژه‌یاسا و پێنج بڕیار په‌سه‌ندكراون.

ئاماژه‌ به‌وه‌شكراوه‌ له‌نێو بڕیاره‌كاندا ئه‌و بڕیاره‌ش هه‌یه‌ كه‌ سه‌پاندنی سزا به‌سه‌ر ئێراندا له‌خۆده‌گرێت.

ڤۆڵۆدیمیر زێلێنسكی سه‌رۆكی ئۆكرانیا ره‌شنووسی ئه‌و بڕیاره‌ی پێشكه‌شی په‌رله‌مان كردبوو كه‌ سزای ئابووری و سزاگه‌لی دیكه‌ دژی ئێران له‌ خۆده‌گرێت.

به‌پێی ره‌شنووسه‌كه‌ سزاكان بۆ ماوه‌ی 50 ساڵ به‌سه‌ر ئێراندا ده‌سه‌پێنرێن و له‌نێو رێكاره‌كانی سنوورداركردندا، هه‌ریه‌ك له‌ قه‌ده‌غه‌كردنی ته‌واوه‌تی بازرگانی له‌گه‌ڵ وڵاته‌كه‌ و راگرتنی ترانزێتتی سه‌رچاوه‌ به‌ خاكی ئۆكرانیا، گه‌شته‌ ئاسمانییه‌كان و گواستنه‌وه‌ له‌رێگه‌ی ئاسمان و خاكی ئۆكرانیاوه‌ له‌خۆده‌گرێت.