زیاتر لە حەوت ملیار دینار بۆ بەرەنگاربوونەوەی وشکەساڵی تەرخان دەکرێت

پەیامی کورد... زیاتر لە حەوت ملیار دینار بۆ بەرەنگاربوونەوەی وشکەساڵی تەرخان دەکرێت

حکومەتی هەرێمی کوردستان زیاتر لە حەوت ملیار دینار بۆ بەرەنگاربوونەوەی وشکەساڵی لە شاری هەولێر و دەوروبەری تەرخان دەکات.

وەزارەتی شارەوانی و گەشتوگوزار بڵاوی کردووەتەوە، مەسروور بارزانی سەرۆکی حکومەتی هەرێمی کوردستان لەسەر بودجەی بەگەڕخستنی وەزارەتی شارەوانی و گەشتوگوزار بۆ ساڵی ٢٠٢٢ ڕەزامەندیدا بە خەرجکردنی بڕی ٧ ملیار و ٦٥٤ ملیۆن و ٥٩٠ هەزار و ٦٨٦ دینار بۆ لێدان و هەڵکەندنی ژمارەیەک بیری ئاوی خواردنەوە.

وەزارەتی شارەوانی ڕاشیگەیاندوە، خەرجکردنی ئەو بڕە پاریە بەمەبەستی بەرەنگاربوونەوەی وشکەساڵی و دابینکردنی ئاوی خواردنەوەیە بۆ لێدان و هەڵکەندنی ١٣٨ بیری ئاوی خواردنەوەی بەدیل و نوێ لە هەولێر و دەوروبەری، ئەم بیرە نوێیانە گرفتی دابینکردنی ئاوی خواردنەوە لەو سنوورانە چارەسەر دەکەن.

لەوبارەیەشەوە ئەندازیار ئاری ئەحمەد بەڕێوەبەری گشتی ئاو و ئاوەڕۆ لە وەزارەتی شارەوانی و گەشتوگوزار سەبارەت بە وادەی لێدان و هەڵکەندنی ئەو بیرانە ڕایگەیاندوە: ڕێکارەکانی جێبەجێکردنی ئەو بڕیارە ئامادەکراوە و دەدرێتە تەندەرین و دەست بە جێبەجێکردنیان دەکرێت.