پێنج هاووڵاتیی دیکە لە ڕۆژهەڵاتی کوردستان دەستبەسەر کران

پەیامی کورد .... پێنج هاووڵاتیی دیکە لە ڕۆژهەڵاتی کوردستان دەستبەسەر کران

هاوکات لەگەڵ شەپۆلی دەستبەسەر کردنی هاووڵاتییانی کورد لە کوردستان لانیکەم پێنج هاووڵاتیی دیکە لە شارەکانی نەغەدە، بۆکان و مەریوان دەستبەسەر کراون.

ڕۆژی چوارشەممە ٢٤ی بەفرانباری ٢٧٢٠ (١٣ی ژانویەی ٢٠٢١)، هێزەکانی ئیدارەی ئیتلاعاتی نەغەدە هەڵیانکوتاوەتە سەر ماڵی هاووڵاتییەک و سێ ئەندامی ئەو بنەماڵەیە بە ناوەکانی عەبدوڵڵا حاجی ئەحمەدی، پەیمان حاجی ئەحمەدی (کوڕی عەبدوڵڵا) و گەلاوێژ عەبدوڵڵاهی (دەزگیرانی پەیمان) لە لایەن ئەو هێزانەوە دەستبەسەر کراون.

ئەو سێ هاووڵاتییە دوای دەستبەسەر کران بۆ شوێنێکی نادیار گوازراونەتەوە و چارەنووسیان نادیارە.

لەلایەکی دیکەوە و هاوکات، لاوێکی خەڵکی شارەدێی ’نێ‘ سەر بە شاری مەریوان بە ناوی عادڵ پەروازە لەلایەن هێزە ئەمنییەکانەوە دەستبەسەر و بۆ شوێنێکی نادیار گوازراوەتەوە.

ڕۆژی دووشەممە ٢٢ی بەفرانبار (١١ی ژانویە) هاووڵاتیەکی خەڵکی بۆکان بە ناوی حوسێن گەردشی لەلایەن هێزە ئەمنییەکانەوە دەستبەسەر کراون و چارەنووسیان نادیارە.

هەتا کاتی ئامادە کردنی ئەم هەواڵە هۆ یان هۆکارەکانی دەستبەسەر کرانی ئەو پێنج هاووڵاتییە و هەروەها ئەو تۆمەتانەی کە لەلایەن ناوەندە ئەمنییەکانەوە خراوەتە پاڵیان ناڕوون ماوەتەوە.

بە پشتبەستن بە ئاماری تۆمارکراو لە ناوەندی ئامار و بەڵگەنامەکانی ڕێکخراوی مافی مرۆڤی هەنگاو، لە ماوەی کەمتر لە یەک حەوتوودا لانیکەم ٢٨ هاووڵاتیی کورد لە شارەکانی مەهاباد، بۆکان، ڕەبەت، نەغەدە، مەریوان، سەوڵاوا، سنە و کەرەج لەلایەن هێزە ئەمنییەکانی ئێرانەوە دەستبەسەر کراون.