لە فەڕەنسا ژمارەی زیندانی کراوان بۆ ئاستێکی پێوانەیی بەرزدەبێتەوە

پەیامی کورد   ...  لە فەڕەنسا ژمارەی زیندانی کراوان بۆ ئاستێکی پێوانەیی بەرزدەبێتەوە

ژمارەی زیندانیکراوان لە فڕەنسا لە ٧٣٠٠٠ کەس نزیک دەبێتەوە کە لەئێستادا لە زیندانەکان و یەکەی چاکسازیدا راگیراون کە ئەوەش ١٢٠%ـی توانای زیندانەکانی ئەو ووڵاتەیە بۆ وەرگرتن و جێکردنەوەی زیندانییەکان، ئەو ژمارەیەش بە ژمارەیەکی پێوانەیی دادەنرێت لە مێژووی ئەو وڵاتەدا.

ئاژانسی هەواڵی فەڕەنسا لە دوایین راپۆرتی خۆیدا دەڵێت، لەئێستادا ژمارەی زیندانیکراوان لە زیندانەکان و یەکەی چاکسازی ووڵاتەکەیاندا لە ٧٣٠٠٠ کەس نزیک دەبێتەوە، ئەوەش لە سەرووی توانای زیندانەکانە بۆ لەخۆگرتنی ئەو ژمارە زۆرەی زیندانیکراو، بەجۆرێک لەم کاتەدا رێژەی زیندانیکراوان گەیشتوەتە ١٢٠% توانای لە خۆگرتنی چاکسازییەکان لەکاتێکدا ساڵی رابردوو رێژەکە ١١٥.٤% بوە.

ئەوەشی خستوەتەڕوو، ئەمساڵ سێ هەزار زیندانی دیکە نێردراون بۆ بەشی چاکسازی، بەوهۆیەش دوو هەزار و ٢٠٠ زیندانیکراو سیستەمی گونجاوی خەوتنیان نییە و لەسەر زەوی ناو زیندانەکان دەمێننەوە.

ئاژانسەکە ئاماژەی بەوەش داوە، نزیکەی یەک لەسەر چواری ئەو زیندانیانە بەشێوەیەکی کاتی لە زیندان راگیراون و تۆمەتی جۆراوجۆریان دراوەتەپاڵ، بۆیە لەئێستادا چاوەڕێی بڕیاری ئازادکردن یان یەکلاییکردنەوەی دۆسییەکانیان دەکەن.