نێچیرڤان بارزانی سەرۆکى هەرێمى کوردستان لەگەڵ باڵیۆزى هێندووستان کۆبووەوە

پەیامی کورد     ...   نێچیرڤان بارزانی سەرۆکى هەرێمى کوردستان لەگەڵ باڵیۆزى هێندووستان کۆبووەوە

نیوەڕۆى ئەمڕۆ دووشەممە 2021/10/25 نێچیرڤان بارزانى، سەرۆکى هەرێمى کوردستان، پێشوازى لە براشانت بایس باڵیۆزى هێندووستان لە عیراق کرد.

لە کۆبوونەوەیەکدا سەرۆک نێچیرڤان بارزانى پیرۆزبایی دەستبەکاربوونى لە باڵیۆز کرد و هیواى سەرکەوتنى بۆ خواست، هەموو پشتگیرییەکیشى بۆ سەرخستنى ئەرک و کارەکانى نیشان دا، هەروەها خواستى هەرێمى کوردستانى بۆ برەودان بە پەیوەندییەکان و بەتایبەتیش ڕەخساندنى دەرفەتى وەبەرهێنان و سەرمایەگوزاریى هێندووستانی دووپات کردەوە و سوپاس و ئەو دەرفەتانەى کرد کە تا ئێستا لەم بوارەدا لە هەرێمى کوردستان پێشکەشیان کردوون.

لاى خۆیەوە باڵیۆزى هندستان جەختى لەوە کردەوە کە هندستان بە بایەخ و گرینگییەوە لە پەیوەندییەکان و دەرفەتەکانى وەبەرهێنان و سەرمایەگوزارى لە عیراق و هەرێمى کوردستان دەڕوانێت و لەگەڵ تیمى کونسوولخانەیان لە هەولێر بەرنامەیەکى چالاکیان بۆ برەودان بە پەیوەندییەکان و بوارەکانى هاریکاری هاوبەش هەیە و کارى لەسەر دەکەن. هەروەها ئاماژەى بە کۆرسەکانى مەشق و ڕاهێنانى پیشەیى کرد کە لە عیراق و هەرێمى کوردستان پێشکەشیان دەکەن.

تاوتوێکردنى هەڵبژاردنەکانى عیراق و ئەنجامەکانى و چاوەڕوانى و هەوڵەکان بۆ پێکهێنانى حکوومەتى داهاتووى فیدراڵى عیراق، تەورێکى دیکەى کۆبوونەکە بوو. تیایدا هەردوولا هاوڕا بوون لەسەر ئەوەى کە بنیاتنانى سیستەمى دامەزراوەیى بۆ پاراستنى دیموکراسى، هەروەها پێگەیشتنى سیاسى و بەشداری دەنگدەر لە پرۆسەى دەنگداندا بۆ گۆڕانکاریى ئاشتیانە پێویستە و جەختیان لە گرینگی ئارامى و سەقامگیری عیراق بۆ تەواوى ناوچەکە کردەوە.

کولتوورى پێکەوەژیان و لێبوردەیى لەنێوان پێکهاتەکاندا وێڕاى جیاوازیی ئایینى و نەتەوەیى لە هندستان و هەرێمى کوردستان، هەڵگرتنى کۆتووبەندى سەفەر بۆ هندستان، پەتاى ڤایرۆسى کۆرۆنا و لێکەوتەکانى لەگەڵ پرۆسەى ڤاکسین، گرینگی گەشتى ڕاستەوخۆى ئاسمانیى نێوان هەردوولا و سەردانى هاووڵاتیانى هەرێمى کوردستان بۆ چارەسەرى پزیشکى لە هندستان، کارى ڕەوندى هندستانى لە هەرێمى کوردستان و چەند پرسێکى دیکەش لە کۆبوونەوەکەدا خرانە بەر باس کە کونسوولى گشتی هندستان لە هەرێمى کوردستان، ئامادەى بوو.